Сонуннар

Күрэхтэһии мэҥэлэр кыайыыларынан түмүктэннэ

Кулун тутар ый 22 күнүгэр республика ветераннарыгар хабылыкка, хаамыскаҕа биирдиилээн уонна хамаанданан бастыыр иһин күрэхтэһиитэ буолла. Бу күрэхтэһии аан бастаан спорт уонна физическэй культура министерствотын халандаарынай былааныгар киирэн ыытылынна. Барыта 13 улуустан 90 кыттаачы ДЮСШ-2 саалатыгар муһунна.

Күрэхтэһии үөрүүлээх аһыллыытыгар ветераннары Манчаары аатынан спорт төрүт көрүҥнэрин кииниттэн директоры солбуйааччы Борисов И.И., республикатааҕы ветераннар бырааптарын көмүскүүр Ассоциация председателэ Андреева Д.П., хабылык, хаамыска республикатааҕы Федерациятын президенэ Григорьева О.Г. эҕэрдэлээтилэр.

Кинилэр аҕам саастаах дьоммут бэйэлэрин тус холобурдарынан спорду, чөл, доруобай олоҕу тарҕатыыга эдэр ыччакка холобур буолалларын бэлиэтээтилэр.

Билиҥҥи кэмҥэ төрөөбүт дойдуга тапталы, бэриниилээх буолууну өбүгэлэрбит хаалларбыт үтүө үгэстэрин, оонньууларын нөҥүө дьиэ кэргэҥҥэ, оҕолорго, сиэннэргэ билиһиннэрэр, үөрэтэр-иитэр сорук турарын чопчулаатылар.

Үөрүүлээх түгэҥҥэ Григорьева О.Г. 75 сааһын туолбут Мухин Д.З. эҕэрдэ суругу туттарда.

Нам Федерациятын толорооччу председателэ Охлопкова М.Е. юбилейдаах сылынан спорт ветеранын Иванов Г.Г. (Бүлүү) эҕэрдэлээтэ. Күрэхтэһии сүрүн судьуйата Дмитриев А.И. хомус алыптаах дорҕоонунан бары мустубут ыалдьыттары, ветераннары алгыстаата.

Күрэхтэһии биэс бөлөҕүнэн 55 сааһыттан 75-тэн үөһэ саастаахтарга дылы табыгастаахтык аттарыллан ыытылынна. Остуол судьуйалара Кетехов В.Р., Терентьева К.Г., Сыроватская Ю.С., Михайлов К.Н., Потапова А.А., Иванов А.А. оонньуу аайы тэҥ ирдэбили туруоран сыаналаатылар. Ветераннар оонньууга бииргэ алтыһар дьоннорун көрсөн, сэһэргэһэн, оонньоон бу күн олус сэргэхсийдилэр.

Кэбээйиттэн сылдьар Максимов С.А. толкуйдатар, тарбаҕы, илиини сайыннарар оонньуулары көрдөрдеө, үөрэттэ. Нам Федерациятын ветераннара сонун сэргэх, бириистээх оонньуулары тэрийдилэр.

Быйыл Аммаҕа ыытыллар Олоҥхо ыһыаҕар бэлэмнэнэн былыргылыы хабылык оонньууга уларыйыы киирбитин Белолюбская Н.Н. Михайлов К.Н. билиһиннэрдилэр, көрдөрдүлэр.

Хамаанданан бастыыр иһин киирсии хара маҥнайгыттан Бүлүү уонна Мэҥэ Хаҥалас ветераннарын икки ардыгар буолла. Түмүккэ Мэҥэ Хаҥалас ветераннара кыайыылаах таҕыстылар. Үһүс миэстэни Нам уонна Дьокуускай хамаандалара былдьастылар. Быһаарыылаах бүтэһик бөлөх оонньуутун түмүгүнэн тэҥ очколанан баран, хаачыстыба быһааран, Дьокуускай инники таҕыста.

Үс оонньууну субуруччу оонньоон бастыҥ бириэмэни көрдөрөн, муҥутуур кыайыылаахтарынан буоллулар: Иванова Л.М., Петров М.М.

Күрэхтэһии түмүк көрдөрүүтэ:

Эр дьон 1-кы бөлөх (1969-65): 1 м – Петров Михаил (Дьокуускай), 2 м – Хаптагаев Семен (Таатта), 3 м – Кузьмин Алексей (Бүлүү).

2-с бөлөх (1964-60): 1 м – Павлов Анатолий (Горнай), 2 м – Нестеров Георгий (Амма), 3 м – Варламов Алексей (Таатта).

3-с бөлөх (1959-55): 1 м – Аргунов Гаврил (Мэҥэ Хаҥалас), 2 м – Николаев Илья (Бүлүү), 3 м – Васильев Анатолий (Ньурба).

4-с бөлөх (1954-50): 1 м – Борисов Василий (Мэҥэ Хаҥалас), 2 м – Иванов Дмитрий (Бүлүү), 3 м – Кириллин Валерий (Өлөөн).

5-с бөлөх (1949): 1 м – Никифоров Николай (Таатта), 2 м – Иванов Гаврил (Бүлүү), 3 м – Мухин Дмитрий (Нам).

Дьахталлар 1-кы бөлөх (1969-65): 1 м – Николаева Галина (Бүлүү), 2 м – Габышева Сусанна (Ньурба), 3 м – Охлопкова Наталья (Уус Алдан).

2-с бөлөх (1964-60): 1 м – Иванова Лариса (Ньурба), 2 м – Попова Екатерина (Мэҥэ Хаҥалас), 3 м – Яковлева Саргылана (Эдьигээн).

3-с бөлөх (1959-55): 1 м – Николаева Марина (Бүлүү), 2 м – Григорьева Мария (Мэҥэ Хаҥалас), 3 м – Белолюбская Надежда (Дьокуускай).

4-с бөлөх (1954-50): 1 м – Федорова Антонина (Мэҥэ Хаҥалас), 2 м – Боронова Анастасия (Бүлүү), 3 м – Лукинова Мария (Нам).

5-с бөлөх (1949): 1 м – Баишева Анна (Мэҥэ Хаҥалас), 2 м – Ядрихинская Ольга (Нам), 3 м – Герасимова Антонина (Бүлүү).

Күрэхтэһии биир уратыта – саҥа оонньооччулар. Толлон турбакка, быраабыланы чопчулаһан, чуолкайдаан бэйэлэрин харса суох боруобалаан бастакы тургутууларын аастылар. Күрэхпит түмүктүүр чааһыгар ытык оонньооччуларбытыгар сүгүрүйэн сэмэй бэлэх ууннубут: Ядрихинская О.Н. 83саастаах (Нам), Захарова А.И. 83 саастаах (Таатта), Романов В.Н. 83 саастаах (Мэҥэ Хаҥалас), Рязанскай С.С. 80 саастаах (Амма).

Түмүккэ бу күрэхтэһиини тэрийбит Манчаары аатынан спорт төрүт көрүҥнэрин киинин инструктордарыгар, методистарыгар Семёнова С.Н., Фёдорова В.Н., күрэхтэһии кылаабынай судьуйатыгар Дмитриев А.И. махтанабыт.

Надежда БЕЛОЛЮБСКАЯ, Манчаары аатынан спорт төрүт көрүҥнэрин республикатааҕы киинин остуол оонньууларыгар тренерэ.

Добавить комментарий

Ваш адрес email не будет опубликован. Обязательные поля помечены *

201717
Бүгүн : 0