Истиҥ көрсүһүү

Саха сирин спорт кыһыҥҥы көрүҥнэригэр Спартакиадатын бастакы күнүгэр албан аатырбыт олимпийскай чемпионнар Ольга Зайцева уонна Никита Крюков «Алдан» олимпийскай эрэл спортивнай оскуолатын күндү ыалдьыттарынан буоллулар.

Сахалыы үгэһинэн олимпийскай чемпионнары ааҥҥа киириигэ Саха Республикатын физическэй култуураҕа уонна спорка министрэ Леонид Спиридонов, спортивнай оскуола салалтата эҕэрдэлии көрүстүлэр. Күндү ыалдьыттарга киирээттэрин кытта сибэкки дьөрбөтө туттарылынна. Итиэннэ сахалыы хомус тыаһыгар доҕуһуоллатан, арыылаах алаадьынан уонна уохтаах кымыһынан күндүлээтилэр.

Олимпийскай чемпионнар Ольга Зайцева уонна Никита Крюков бэйэлэрин эҕэрдэлэрин эттилэр, махтаннылар. Ол кэнниттэн өбүгэлэрбит үгэһинэн, күндү ыалдьыттартан, бэлиэ сиргэ салама ыйыылларыгар көрдөстүлэр. Манна сыһыары тутан эттэххэ, Никита Крюков Алдаҥҥа хаһыс да кэлиитэ. Кини бастаан өссө спортсмен быһыытынан манна эрчиллэн, үрдүк көрдөрүүлэри ситиспитин санатар тоҕоостоох. Онтон Ольга Зайцева Алдаҥҥа бастакы кэлиитэ.

Ити курдук, Алдан сиригэр истиҥ тэрээһиннэр буоллулар.

Петр Павлов.

Ааптар хаартыскаҕа түһэриилэрэ.