Сонуннар

Дмитрий Сыромятников – Кэрэһиннээх бирииһигэр

Дмитрий Васильевич Сыромятников – РФ норуотун үөрэҕириитин туйгуна, сахалартан дуобакка аан дойдутааҕы категориялаах бастакы судьуйа, СР спорка үтүөлээх үлэһитэ, Саха сиригэр киэҥник биллэр коллекционер буоларын үгүстэр билэбит.

Кулун тутар 16-17 күннэригэр Дьокуускайга сүүс харахтаах дуобакка бэтэрээннэр ортолоругар өрөспүүбүлүкэ түһүлгэтэ буолан ааста. Бу 27-с төгүлүн Дмитрий Сыромятников – Кэрэһиннээх бирииһигэр ыытыллынна. Манна 9 улуустан 37 кыттааччы 11 тур устата күөн көрүстэ. Күрэхтэһии үөрүүлээх аһыллыытыгар спорт министрин солбуйааччыта Гаврил Мохначевскай, управление начаалынньыга Роман Оконешников, өрөспүүбүлүкэ дуобакка федерациятын вице-президенэ Иван Токусаров, Мэҥэ-Хаҥаластан спорт управлениетын салайааччыта Алексей Попов истиҥ сылаас тылларынан эҕэрдэлээн, ситиһиилэри баҕардылар. Кинилэр 84 сааһын томточчу туолбут спорт бэтэрээнэ Дмитрий Сыромятников билигин да дуобакка, саахымакка үрдүк үтүө түмүктэри ситиһэрин, ыччакка холобур буоларын тоһоҕолоон эттилэр.

Дьахталларга уонна эр дьоҥҥо тыҥааһыннаах күрэхтэһии саҕаланар. Кыттааччылар ортолоругар аан дойду Кубогын кыайыылаахтара маастардар Иннокентий Аринкин, Дмитрий Сыромятников, аан дойду бэтэрээннэргэ чемпионатын призера Розалия Егорова (Нам), Саха сирин 10 төгүллээх кыайыылааҕа Зоя Саввина (Таатта), өрөспүүбүлүкэ элбэх төгүллээх чөмпүйүөнэ Валерий Хорин (Дьокуускай) о.д.а. бааллар.

Хара маҥнайгыттан Валерий Хорин (Дьокуускай) бииртэн биир кыайыыны ситиһэн, үстэ эрэ тэҥнэһэн холкутук бастаата. Бириистээх миэстэ иһин тиһэх турга тиийэ сытыы киирсиилэр буоллулар. Николай Жирков үс кэнники турга күүстээх утарсааччыларын хотуталаан иккис миэстэҕэ биирдэ баар буола түстэ. 3-5 миэстэлэри Степан Румянцев (Уус Алдан), Иннокентий Ефимов (Верхоянскай) уонна Дмитрий Сыромятников ыллылар. 70-н аҕа саастаахтарга Дмитрий Сыромятников, Петр Иванов (Дьокуускай), Егор Дьяконов (Уус Алдан) суруллубут бэрээдэгинэн миэстэлэстилэр.

Бэтэрээн дьахталларга сыралаах оонньуу түмүгэр Анастасия Собакина (Чурапчы), Мария Третьякова (Мэҥэ-Хаҥалас), Мария Бырдыннырова (Таатта) бириистээх миэстэлэри ыллылар.

«Кэрэ-Дуо» диэн дуобакка чөмпүйүөн үрдүк аатын Николай Климентов (Майа) ылла. Михаил Петров (Майа), Дмитрий Сыромятников тилэх баттаһан таҕыстылар. Дьахталларга Павлина Дорофеева (Бүтэйдээх), Анастасия Собакина (Чурапчы), Акулина Беляева (Нам) инники таҕыстылар.

Онон, сүүс харахтаах дуобакка дьахталларга, эр дьоҥҥо 55-70 уонна 70-тан аҕа саастаахтарга бастакы алта миэстэҕэ, «Кэрэ-Дуо» оонньууга бириистэр ананнылар. Чөмпүйүөннэргэ анал кубоктар, мэтээллэр туттарылыннылар.

Түмүккэ кыттааччылар Зоя Саввина, Мария Бырдыннырова, Степан Румянцев о.д.а. күрэхтэһии сыллата үрдүк тэрээһиннээхтик барарынан махталларын тиэртилэр, кэлэр сылга дуобат икки көрүҥүн холбоон ыытарга этиилээх буоллулар.

Степан АНДРЕЕВ.

 

 

Добавить комментарий

Ваш адрес email не будет опубликован. Обязательные поля помечены *

160247
Бүгүн : 147