Сонуннар

Чурапчыга – “Байанай күрэҕэ”

Кулун тутар 22 күнүгэр Чурапчы күөлүн Күрүө Тумуһугар сыллата ыытыллар нэһилиэктэр икки ардыларыгар ,,Байанай күрэҕэ” буолла. Күрэхтэһии нэһилиэктэр икки ардыларыгар ыытыллар комплекснай спартакиадаҕа киирэр. Барыта 15 нэһилиэк кыттыыны ылла.

Күрэхтэһии аһыллыытыгар улуус баһылыга Степан Саргыдаев, улуус дьокутааттарын сэбиэтин председателэ Яков Оконешников, улуус булчуттарын федерациятын салайааччыта Алексей Егоров, Чурапчы нэһилиэгин баһылыга Владимир Сивцев, айылҕа харыстабылын инспекцтятын начальнига Михаил Догордуров, кылаабынай судьуйа Владимир Павлов эҕэрдэ тыл эттилэр, наҕараада туттардылар.

Барыта 6 көрүҥҥэ күрэхтэстилэр. Ытыыга, автомат сааны ыһан баран хомуйууга, викторинаҕа, ойбон алларыытыгар, чэй оргутууга уонна эстафетаҕа. Үс көрүҥ кэнниттэн эбиэт тэрилиннэ.  “Чурапчы” тыа хаһаайыстыбатын производственнай кооператива босхо ис миининэн, лэппиэскэнэн, итии чэйинэн күндүлээтилэр. Бу иһин кыттааччылар, көрөөччүлэр махталлара улахан.

Сыралаах, элбэх хаһыылаах күрэх түмүгэр ытыыга 5-с, саа хомуйуутугар 6-с, викторинаҕа 1-кы, ойбон алларыытыгар уолаттарга 4-с, эр дьоҥҥо 8-с, чэй оргутуутугар 4-с, эстафетаҕа 6-с буолан 337 очукуоламмыт Хайахсыт нэһилиэгэ бастаата, 327 очукуолаах Одьулуун иккис, 327 очукуолаах Төлөй спортсменнара үһүс миэстэни ыллылар.

Кыайыылаахтар дипломнарынан, бириистэринэн наҕараадаланнылар.

Алексей Слепцов.

Чурапчы.

Добавить комментарий

Ваш адрес email не будет опубликован. Обязательные поля помечены *

160240
Бүгүн : 140