Сонуннар

Боксаны ытыктыы үөрэниэхтэрэ…

UFC чемпионнуу сылдьыбыт Конор Макгрегор профессиональнай боксаҕа биир да хотторуута суох Флойд Майвезеры кытта киирсэн хотторбута. Конор охсуута, техниката үчүгэй эрээри, боксер буолбатах. Бэйэтигэр эрэнэн Флойду үөхсэн “тииһин сааҕын суунан” аҕай биэрбитэ. Киирсиилэригэр Флойд таптарбакка куота сылдьан баран, Конор сылайбытын кэннэ сирэйин түнэлээбитэ.

Ол курдук, аны ыарахан ыйааһыҥҥа UFC муҥутуур кыайыылааҕа Фрэнсис Нгнанну эмиэ боксаҕа көһөргө дураһыйбыта. Кини киирсиитигэр тустан буолбакка, үксүн дөйүтэн кыайталыыр, ол иһин бадаҕа бэйэтигэр эрэннэҕэ. Уонна электроннай сыыппаранан көрдөрөр грушаны охсууга саамай күүстээх киһинэн биллэр. Ол да иһин бука профбоксаҕа дураһыйдаҕа. Онно күүстээх охсуу эрэ буолбакка, өр кэмҥэ сыралаһан дьарыктанар техника, тактика наада буоллаҕа.

Илиибэр күүстээх буоллум да, барыларын тоҕо солоон ааһыам дии саныыр сыыһа. Фрэнсиһи эбиитин Майк Тайсон дьарыктаабыта, онтон да эр ылыан син. Муҥ саатар биэс сыл дьарыктаммыта буоллар. Ити профессионал боксердар үксүлэрэ, оҕо саастан саҕалаан, любительскэй боксаны ааспыт уолаттар. Александр Усик, Поветкин, Энтони Джошуа олимпийскай чемпионнар.

“Охсон дөйүтэбин уонна миигин Майк Тайсон дьарыктаабыта” диэн санаатын күүһүнэн курдук киирсэн, Нгнанну Энтони Джошуаттан дөйөн, дириҥ далай хараҥаҕа мэлис гыммыта. Оҕуһу туруору туппут курдук хара бэкир киһи, хараҕын тиэрэ көрөн илиитин быластаан, тиэрэ таһыллан сытара. Джошуа UFC аатырбыт чемпионун боҕуттуннардым диэн үөрбэт да курдуга, буолуохтааҕын курдук саныыра. Нганну быраабылата суох киирсиигэ туймааран да ылбатаҕа. Боксаҕа дьэ умса хоруттулар.

Фрэнсис Тайсон Фьюрины кытта син үчүгэйдик киирсибитэ, алҕас табан охторо да сылдьыбыта, бука онтон эр ыллаҕа. Фьюри да сэнээн, үчүгэйдик дьарыктаммакка да киирбитэ быһыылааҕа.

Россияҕа саамай күүстээх киһинэн Михаил Кокляев биллэрэ. Дьэ, ол күүһүгэр эрэнэн Александр Емельяненконы кытта боксаҕа киирсэргэ дураһыйбыта. Александр боксер да буолбатар, штангиһы кыайарын биллэрэ.

Хайдах киирсээри гыннылар да, интернетинэн илэ да көрсөн этиһэр, үөхсэр идэлээхтэр.

Ол курдук, Кокляев мээнэ хаардыы хаамыам, тэпсэн ааһыам диэн үөхсэрэ. Эбиитин хортууһунан бырахпыта, ону Александр хабан ылан бэйэтин бырахпыта, куондарынан сүүһүн хайы түспүтэ.

Онтон дьэ боксаҕа киирсэллэригэр, Александр Кокляевы аһынан туруора-туруора кырбаабыта.

Онон “дьыбардаахха саҥарбакка” билбэт дьыалаҕа киирэн биэрбэтэх ордук. Туохха эмит киирэр буоллахха, элбэх практиканы, үөрүйэҕи эрэйэр. Хара күүһүнэн буолбакка. Нууччалар “сила есть ума не надо!” дииллэригэр киирэн биэрбэккэ…

Ородьумаан.

Добавить комментарий

Ваш адрес email не будет опубликован. Обязательные поля помечены *

160225
Бүгүн : 125