Сонуннар

Бастакы олимпийскай чемпиоммутугар сүгүрүйүөҕүҥ!

Кулун тутар 7-10 күннэригэр Туймаада туонатыгар сахаттан бастакы олимпийскай чемпион Роман Дмитриев кэриэһигэр көҥүл тустууга эрдэрдэргэ (2004-2006 сс. төрөөбүттэргэ) үгэскэ кубулуйбут норуоттар икки ардыларынааҕы үбүлүөйдээх Х турнир ыытыллар. Быйылгы түһүлгэ Роман Михайлович төрөөбүтэ 75 сылыгар ананарынан уратылаах.

Нэдиэлэ устата – олимпийскай чемпион, ССРС спордун үтүөлээх маастара, Советскай Союз уонна Российскай Федерация үтүөлээх тренерэ Роман Михайлович Дмитриев үбүлүөйүгэр аналлаах араас таһымнаах тэрээһиннэр ыытыллаллар.

Онтон турниры ылан көрдөххө, инники ыытыллыбыттартан барыларыттан састаап да, тэрээһин даҕаны өттүнэн күүстээх, киэҥ далааһыннаах буолара күүтүллэр. Бу биһиги, улуу бөҕөспүтүгэр ытыктабыл, сүгүрүйүү, кэриэстэбил туоһута буолар.

Тэрийээччилэр биллэрбиттэринэн, түһүлгэҕэ 12 тас дойдуттан, ол иһигэр, тустууга өрүү күүстээхтэринэн биллэр Иран, Монголия, Индия, Азербайджан, Грузия, Казахстан, Беларусь, Кыргызстан, Молдова о.д.а. эдэр бөҕөстөрө кэлэн күөн көрсүөхтэрэ. Күрэхтэһии уолаттарга эрэ буолбакка, кыргыттарга эмиэ ыытыллар. Онон Россия эдэрдэргэ сүүмэрдэммит хамаандатыттан уолаттарга уонна кыргыттарга 20-лии бастыҥнара кэлиэхтэрэ.

Ону тэҥэ, Россия 16 регионуттан, барыта 261 кыттааччы, 40-чэ тренер, 20-чэ судьуйа кэлэрэ күүтүллэр. Турнир кылаабынай судьуйатынан – норуоттар икки ардыларынааҕы категориялаах судьуйа Солтан Засеев (Пермь) үлэлиэҕэ.

Саха сириттэн уолаттарга 70-чэ, кыргыттарга 10-ча спортсмен күөн көрсүөҕэ. Кинилэр ортолоругар Лев Павлов, Игорь Матвеев, Николай Охлопков, Роман Николаев, Лилияна Рожина, Надежда Куличкина уо.д.а. бааллар.

Үбүлүөйдээх түһүлгэ ыҥырыылаах ыалдьыттарынан Россия спортивнай тустууга федерациятын президенэ Михаил Мамиашвили, Россия хамаандатын тренерэ Зелимхан Гусейнов, спорт үтүөлээх маастара Сергей Корнилаев, Р.М. Дмитриев дьиэ кэргэниттэн Антонина Дмитриева, оҕолоро буолуохтара.

Күрэхтэһии бириискэ фондата – 2 мөлүйүөн. Кыайыылаахтар бары сиэдэрэйдик оҥоһуллубут Чемпионнар курдарынан наҕараадаланыахтара. Ону таһынан бастаабыттар – 35, иккистээбиттэр – 25, үһүстээбиттэр – 15 тыһ. солк. харчынан бэлиэтэниэхтэрэ. Кыайыылааҕы бэлэмнээбит тренер 10 тыһ. солк. бириэмийэлэниэ. Өссө бастыҥ тустууну көрдөрбүттэргэ үчүгэй сыаналаах анал бириистэр баар буолуохтара.

Киириитэ – босхо. Спорду таптааччылар, тустууну сэҥээрээччилэр! Кулун тутар 8-10 күннэригэр “Өрөгөй” Спорка киинигэр күргүөмүнэн көхтөөхтүк кэлэн бастакы олимпийскай чемпиоммут Роман Михайлович Дмитриев аатыгар Сүгүрүйүөҕүҥ, Саха сиригэр тустууну хайдах курдук таптыылларын Көрдөрүөҕүҥ, бэйэбит уолаттарбытыгар Ыалдьыаҕыҥ!..

Петр ПАВЛОВ.    

Добавить комментарий

Ваш адрес email не будет опубликован. Обязательные поля помечены *

199553
Бүгүн : 469