Сонуннар

Бастакы күн түмүгэ хайдаҕый?

Улуу тустуук, аатырбыт тренер, биллиилээх государственнай уонна общественнай деятель Роман Михайлович Дмитриев төрөөбүтэ 75 сылыгар анаммыт көҥүл тустууга норуоттар икки ардыларынааҕы турнир бастакы күнэ түмүктэннэ.

Бүгүн уолаттар 57, 65, 74, 86, 97 кг, онтон кыргыттар 50, 55, 59, 65, 72 кг күрэхтэһиини саҕалаатылар. Хапсыһыылар үс көбүөрүнэн сып-сап ыытылыннылар. Күн түмүгүнэн бары ыйааһыннарга сарсын финалга кимнээх киирсэллэрэ быһаарылынна.

Онуоха биһигиттэн, билиҥҥи кэмҥэ бу саастаахтарга саамай эрэнэр бөҕөспүт – Лев Павлов финалга эрэллээхтик таҕыста. Кини утуу-субуу А.Фокиновы, Россия хамаандатын чилиэнэ А.Мусахаджиевы, С.Прокопьевы, Д.Петрову, Н.Захаровы кыайталаата.

Бу ыйааһыҥҥа үөһэ бөлөхтөн дагестанец Халид Магомедов утарсааччыларын кыайталаан финалга таҕыста. Кини биһиги уолаттарбыт Д.Федоровы, Г.Гурьевы, Ю.Винокуровы хотто.

Онон былырыын эмиэ «Өрөгөй» Спорка бэлэмнэнии киинигэр буолбут Россия 23-гэр диэри саастаахтарга күрэхтэһиитигэр курдук, 57 киилэҕэ кыайыылаах аатын ким ыларын быһаарар хапсыһыыга Лев Павлов уонна Халид Магомедов көрсүөхтэрэ. Билэргит курдук, ол киирсиигэ Лев Павлов кыайыыны ситиспитэ. Бу сырыыга хайдах буолар? Көбүөр көрдөрүө.

Сарсын «санааны уоскутар» бөлөххө биһигиттэн Д.Федоров, Г.Гурьев, Ю.Винокуров, А.Фокинов, С.Прокопьев, Д.Петров тустуохтара, онтон Н.Захаров үһүс миэстэ иһин киирсиэ. Кинилэртэн бастыҥнара икки боруонсаҕа тиксиэхтэрин сөп.

Онтон 65 киилэҕэ Е.Попов, Ю.Григорьев, Ю.Яковлев, И.Матвеев «санааны уоскутар» бөлөххө кыттыахтара. Манна В.Григорьев боруонса мэтээл иһин утарсааччытын кэтэһэн олорор.

74 киилэҕэ А.Румянцев – Т.Никитин пааратын кыайыылааҕа үһүс миэстэ иһин азербайджанец А.Новрузовы кытта тустуоҕа.

86 кг ыйааһыҥҥа Б.Гаврильев турнир боруонса мэтээлин иһин бурят З.Каркуновы кытта киирсиэ.

97 киилэҕэ тустуу эргиир систиэмэтинэн ыытыллар. Манна Евгений Аронов балаһыанньата куһаҕана суох.

PS: Түһүлгэ сорох хапсыһыылара хайдах барбытын манна көрүөххүтүн сөп: https://www.youtube.com/channel/UCdQWiPUliiKpPOVV3JKNb5g

Онтон дьахталлар тустууларыгар 50 киилэҕэ К.Махарова «санааны уоскутар» бөлөххө кыттар. Атын ыйааһыннарга кыттааччылар аҕыйах буоланнар, күрэхтэһии эргиир систиэмэтинэн ыытылыннылар.

Финаллар сарсын күрэхтэһиини үөрүүлээх аһыы кэнниттэн тута, 18:00 чаастан саҕаланыахтара.

Финалга тустуохтара:

57 кг Лев Павлов (Саха сирэ) – Халид Магомедов (Дагестан)

65 кг Андраник Аветисян (Армения) – Адам Архиев (Чечня)

74 кг Асхаб Хаджиев (Казахстан) – Тамир Ешинимаев (Бурятия)

86 кг Димчикдорж Тумурбаатар (Монголия) – Реза Сулейманиан (Иран).

50 кг Диана Гаджиева (Дагестан) – Алина Сагалакова (Хакасия)

55 кг Марта Гетманова (Беларусь) – Номин-Эрдэнэ Мямарсурэн (Монголия)

59 кг Шахзода Алланязова (Узбекистан) – Владислава Кудзин (Беларусь)

65 кг Ксения Цярения (Беларусь) – Александра Жук (Беларусь)

72 кг Ксения Самуйлова (Тверь) – Алина Шавчук (Белаурсь).

Сарсын уолаттарга 61, 70, 79, 92, 125 кг уонна кыргыттарга эмиэ биэс ыйааһыҥҥа спортсменнар күрэхтэһиини саҕалыыллар.

Спорду таптааччылар, тустууну сэҥээрээччилэр! “Өрөгөй” Спорка киинигэр күргүөмүнэн көхтөөхтүк кэлэн бастакы олимпийскай чемпиоммут Роман Михайлович Дмитриев аатыгар Сүгүрүйүөҕүҥ, Саха сиригэр тустууну хайдах курдук таптыылларын Көрдөрүөҕүҥ, бэйэбит уолаттарбытыгар Ыалдьыаҕыҥ!..

Петр ПАВЛОВ.

Ааптар хаартыскаҕа уонна видеоҕа түһэриитэ.          

 

Добавить комментарий

Ваш адрес email не будет опубликован. Обязательные поля помечены *

160247
Бүгүн : 147