Сонуннар

Өлүөнэ очуостарын тэллэҕэр хоккей

«Азия оҕолоро» норуоттар икки ардыларынааҕы VIII спортивнай оонньуу уотун уматыы сиэрин-туомун толорон шайбалаах хоккейга албан аатырбыт олимпийскай чемпионнар кыттыылаах табаарыстыы көрсүһүү ыытылынна.

Бу түгэн, үөрүүлээх тэрээһини ситэрэн-хоторон, киэргэтэн биэрдэххэ сөп. Ытык сиргэ анаан оҥоһуллубут хоккейдыыр корт (былаһаакка) бары ирдэбилгэ эппиэттиир гына оҥоһуллубута киһини астыннарар. Киэҥ-куоҥ, мууһа ыраас, дьэҥкир. Күн-дьыл даҕаны туран биэрдэ. Онон спорду таптааччылар, хоккейы сөбүлээччилэр оонньууну сэргээн, астынан көрдүлэр. Урукку үтүө кэмнэри санаан, ахтан ыллылар. Аан дойдуга киэҥник биллибит хоккеистар төһө да билигин сааһырдаллар даҕаны, түргэн тэтимнээх үчүгэй оонньууну көрдөрдүлэр.

«Хоккей номоххо киирбит сулустара» диэн тэриллибит хамаанда састаабыгар – олимпийскай чемпионнар Вячеслав Фетисов, Андрей Коваленко, Борис Миронов, Алексей Гусаров, Вячеслав Буцаев, Евгений Давыдов, Сергей Шепелев, Ирек Гимаев курдук урут “күөх экранынан” эрэ көрөр албан аатырбыт хоккеистарбыт уонна эмиэ спорт кыһыҥҥы көрүҥнэрин сулустара Анна Богалий, Наталья Починок, вратарынан “ЯкБор” кулууптан Клим Алексеев киирдилэр.

Онтон Саха сирин хамаандатыгар Леонид Спиридонов, Афанасий Владимиров, Владимир Хисамутдинов, Михаил Сивцев, Петр Степанов, Сергей Львов уо.д.а. оонньоотулар.

Оонньуу, Саха сирин Ил Дархана Айсен Николаев шайбаны быласаакка ортотугар быраҕыытынан саҕаланна. Шайбаны бастакынан ким ыларын туһугар хамаанда хапытааннара Вячеслав Фетисов уонна Афанасий Владимиров кииристилэр. Дьэ, онтон икки түһүмэхтээх оонньуу саҕаланна.

Киирсии доҕордуу быһыыга-майгыга барда уонна 6:6 ахсаанынан (Починок-2, Фетисов, Миронов, Коваленко, Гусаров – Хисамудинов, Федосов -2, Владимиров, Харлампиев) эйэлээхтик түмүктэннэ. Манна, хоккей сулустарын кытта мууска эдэр спортсменнар тахсан оонньообуттара кэрэхсэбиллээхтик көһүннэ.

Оонньуу бүтүүтэ икки төгүллээх олимпийскай чемпион, аан дойду уонна Европа хас да төгүллээх чемпиона, спорт үтүөлээх маастара, “Азия оҕолоро” оонньуу посола Вячеслав Фетисов, шайбалаах хоккей Саха сиригэр сайдыытыгар кыаллары барытын оҥорорго эрэннэрдэ уонна хоккей – биһиги республикабытыгар спорт бастакы нүөмэрдээх көрүҥэ буоларыгар баҕарда.

Петр ПАВЛОВ.

Ааптар хаартыскаҕа түһэриитэ.     

Добавить комментарий

Ваш адрес email не будет опубликован. Обязательные поля помечены *

160238
Бүгүн : 138