Сонуннар

Үбүлүөйдээх тэрээһин кинигэ сүрэхтэниитинэн саҕаланна

Саха чулуу киһитэ – олимпийскай чемпион Роман Дмитриев төрөөбүтэ 75 сылын үөрүүлээхтик бэлиэтээһин бүгүн Саха Республикатын национальнай библиотекатыгар «Роман Дмитриев. Мои тетради» диэн кэргэнэ Антонина Софроновна Дмитриева бэлэмнээн таһаарбыт саҥа кинигэтин сүрэхтэниитинэн саҕаланна.

Роман Михайлович үтүө аатыгар, сүдү талааныгар сүгүрүйэн, ытыктаан, кэриэстээн үгүс киһи сааланы толору муһунна. Бу дьиэҕэ син хас да кинигэ сүрэхтэниитигэр сылдьыбытым да, маннык элбэх киһи кыттыылаах сүрэхтэниини өссө көрө илигим. Бу буолар, саханы саха дэппит чулуу киһибитигэр ытыктабыл бэлиэтэ. Манна республика спорка салайааччылара, спорт бэтэрээннэрэ, суруналыыстар, Р.М. Дмитриев биир дойдулаахтара эдьигээннэр, аймахтара, көннөру дьон бааллар.

Тэрээһин Саха Республикатын народнай артыыһа Александр Емельянов толоруутугар Роман Дмитриевкэ анаммыт саҥа ырыанан саҕаллана. Манна сыһыары тутан эттэххэ, бу күн эмиэ Роман Михайловичка сыһыаннаах “Өрөгөй үөрүүтэ” диэн Татьяна Потапова ырыата, Александр Ушницкай толоруутугар экраҥҥа көрдөрүлүннэ.

Кинигэ сүрэхтэһиинин Ил Түмэн депутата, олимпийскай призер, спорт үтүөлээх маастара Георгий Русланович Балакшин кылгас киирии тылынан аста.

Ол кэнниттэн санаа атастаһыытыгар Антонина Софроновна Дмитриева, Ил Түмэн депутата Александр Григорьевич Подголов, СР физическэй култуураҕа уонна спорка министрин солбуйааччы Гаврил Михайлович Мохначевскай, Олимпиада-76 призера Александр Николаевич Иванов, СР атыыга уонна материальнай-техническэй ресурсаларга Госкомитетын председателэ Родион Иннокентьевич Федоров, улуу тренер Д.П. Коркин кэргэнэ Александра Семеновна Коркина, Р.М. Дмитриев Чурапчытааҕы кылааһын салайааччыта Екатерина Семеновна Лукина, Эдьигээн улууһун баһылыга Василий Николаевич Сорокин, суруналыыс Владислав Петрович Коротов, өр сылларга Саха АССР спорка тэрилтэтин салайааччытынан үлэлээбит Афанасий Егорович Алексеев, ытыктанар дьон Михаил Семенович Санников, Дмитрий Федосеевич Наумов, Р.М. Дмитриев аймахтарын ааттарыттан Юрий Семенович Дмитриев уо.д.а. кытыннылар.

Кинилэр бары саҥа кинигэ табыллыбытын, оҕолору, эдэр ыччаты иитиигэ-үөрэтиигэ сүрдээх көмөлөөх буолуоҕун эттилэр. Талааннаах киһи барытыгар талааннааҕын, Роман өссө оскуолаҕа үөрэнэ сылдьан хас биирдии бэлиэ түгэҥҥэ күннүктэри суруйан, бэлиэтэнэн хаалларбыт тэтэрээттэрэ көстөн, историяҕа хаалар дьоһун кинигэ буолбутун бэлиэтээтилэр. Кинигэни Саха Республикатын үтүөлээх сир тутааччыта, Россия бочуоттаах сир тутааччыта, Томпо улууһун бочуоттаах гражданина Семен Васильевич Филиппов үбүлээн таһаарбытыгар махталларын биллэрдилэр.

Көрсүһүү ытык кырдьаҕаһа, 94 саастаах үтүөлээх учуутал, Роман Дмитриев Чурапчытааҕы интернат-оскуолаҕа үөрэнэр кэмигэр кылаас салайааччытынан үлэлээбит Екатерина Семеновна Лукина истиҥ ахтыыта дьону сэҥээртэ да, долгутта даҕаны диэххэ сөп. Тэрээһин кыттыылаахатар сүһүөхтэригэр туран махтанан ытыстарын таһыннылар.

Биир бэлиэ түгэнинэн, А.С. Дмитриева национальнай библиотекаҕа Роман Дмитриев муспут спорт, тустуу туһунан кинигэлэрин, сурунаалларын уонна киниэхэ анаммыт телеграммаларын үөрүүлээх быһыыга майгыга туттарыыта буолла.

Дьэ, ити курдук, республикабыт киин куоратыгар – улуу бөҕөс Роман Дмитриев, үтүөлээх тренер уонна ытыктанар депутат Роман Михайлович Дмитриев 75 сыллаах үбүлүөйдээх бэлиэ түгэнин бэлиэтээһин ситиһиилээхтик саҕаланна.

Аны сарсын Ил Түмэн дьиэтигэр 15:00 чаастан “Роман Михайлович Дмитриев олоҕун, үлэтин туһунан “төгүрүк остуол” ыытыллар. Төрөөбүт күнүгэр – кулун тутар 7 күнүгэр Комсомольскай болуоссакка Р.М. Дмитриев пааматынньыгын иннигэр үөрүүлээх миитин, күнүс 14:00 чаастан Бэчээт дьиэтигэр пресс-конференция уонна киэһэ 17:00 чаастан Опера уонна балет театрыгар Сүгүрүйүү киэһэтэ итиэннэ “Сулус буолан умайдын” диэн спектакль буолуохтара.

Дьэ онтон, кулун тутар 8-10 күннэригэр “Өрөгөй” Спорка бэлэмнэнии киинигэр Роман Дмитриев кэриэһигэр эдэрдэргэ көҥүл тустууга норуоттар икки ардыларынааҕы 10-с турнир ыытыллыа.

Дьокуускай куорат олохтоохторун уонна ыалдьыттары бу тэрээһиннэргэ уонна күрэхтэһиигэ көхтөөхтүк кыттаргытыгар ыҥырабыт.

Петр ПАВЛОВ.

Ааптар хаартыскаҕа түһэриитэ.   

Добавить комментарий

Ваш адрес email не будет опубликован. Обязательные поля помечены *

160247
Бүгүн : 147