Сонуннар

Вячеслав Варламов: «Биэс регионтан барыта 170 дуобатчыт күөн көрсөр»

Бүгүҥҥүттэн саҕалаан Россия үтүөлээх тренерэ Николай Николаевич Кычкин кэриэһигэр 100 харахтаах дуобакка Бүтүн Россиятааҕы XIII турнир саҕаланна.  

Күрэхтэһии сүрүн судьуйатынан – Бүтүн Россиятааҕы категориялаах судьуйа Вячеслав Павлович Варламов үлэлиэҕэ. Турнир үөрүүлээхтик аһыллыытын кэнниттэн тута биһиги киниттэн күрэхтэһии иннинээҕи санаатын үллэстэригэр көрдөстүбүт.

-Күрэхтэһиибит бүгүн саҕаланар, – диир Вячеслав Павлович. – Үс күннээх классическай программабыт. Күрэхтэһиигэ тоҕус гроссмейстер уонна 18 спорт маастара суруттардылар. Барыта 170 кыттааччы кэллэ. Оҕолорго анаан саастарынан араарыллыбыт үс бөлөх баар: 14-гэр, 11-гэр уонна 9-гар диэри диэн. Онон эдэр кыттааччылар элбэхтэр. Кэлиилэртэн биир международнай гроссмейстер уонна биир Россия саҥа гроссмейстера баалларын бэлиэтиэххэ сөп. Ол курдук, Россия саҥа гроссмейстера буолбут Дмитрий Никифоров Иркутскайтан уонна блиц оонньууга аан дойду чемпионката Айгуль Идрисова Башкортостантан кэллилэр. Уопсайа, биэс регион спортсменнара күрэхтэһэллэр.

Күрэхтэһиибит Дуобат-саахымат киинигэр буолар. Бастакы классическай программабыт 30 мүн + 30 сөк оонньууллар. Бүгүн икки туур буолар. Сарсын-өйүүн үстүү туур буолуоҕа. Барыта аҕыс туурдаах. Бүтэһик күн, олунньу 24 күнүгэр блиц программа буолуоҕа. Онно 5+3 оонньуохтара.

Бэйэм санаабар, олох тыҥааһыннаах киирсиилэр буолуохтаахтар, тоҕо диэтэргин, биир дойдулаах күүстээх гроссмейстердарбыт бары кытталлар. Онон кубоктар бэйэбитигэр хааллаллар ханнык.

Бу турнирга Бүтүн Россиятааҕы категориялаах үс судьуйа буолан үлэлиибит. Барыта сүүрбэ судьуйа үлэлиир.

-Вячеслав Павлович, махтал! Күрэхтэһии тэрээһиннээхтик уонна ситиһиилээхтик ыытылларыгар баҕарабыт.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *

160223
Бүгүн : 123