Петр Сивцев аатынан күрэхтэһиигэ

Көҥүл тустууга Россия спордун маастара, киэн туттар уолбут Петр Сивцев аатынан күрэхтэһиигэ Дьокуускайтан, Уус Майатан, Анаабыртан, Чурапчыттан, Үөһээ Бүлүүттэн, Сунтаартан, Амматтан, Орто Халыматтан, Хаҥаластан, Горнайтан 77 эдэр бөҕөс кытаанах хапсыһыылары көрдөрдүлэр.

Уолаттар бары кыайыыга дьулуурдарын көрдөрөн, ыалдьааччыларга бэртээхэй хапсыһыылары бэлэхтээтилэр.

Күрэхтэһиигэ өрөспүүбүлүкэ эдэрдэргэ лидердэрэ кытыннылар. Олортон биирдэстэрэ бэйэлэрин саастыылаахтарыгар Россия чемпионнара Лев Павлов, Андрей Мидловец буоллаллар. Кинилэр чаҕылхай хапсыһыыларын оҕолор эрэ буолбакка, улахан дьон кытары сэҥээрэ көрөн астыннылар.

Улууспут аатын Бэрдьигэстээх, Маҕарас уонна Кэптин оҕолоро чиэстээхтик көмүскээтилэр. Тренер Петр Сивцев иитиллээччилэрин киирсиилэрин бэркэ кэтээн көрдө. Сыыһаларын-халтыларын бэлиэтэнэрэ, ырытара, сүбэ-ама биэрэрэ инникитин тусталларыгар туһалаах буолара саарбаҕа суох.

Бастыҥ уолаттартан ураты, кыайыыга дьулуурдарын, көрдөрбүт кэскиллээх бастыҥ бөҕөстөрбүтүгэр Лев Павловка, Эрэл Леонтьевка, Эйнар Максимовка, Андрей Мидловецка, Вадим Константиновка, Алексей Захаровка анал бириистэр олохтоннулар.

2007-2008 сс. төрөөбүт уолаттарга бэйэлэрин ыйааһыннарыгар бастаатылар: 52 кг – Эдуард Захаров, 57 кг – Вадим Константинов, 62 кг – Эйнар Максимов, 68 кг – Стас Мамаев (бары горнайдар).

Онтон 2009-2010 сыллаахтарга: 45 кг – Ньургун Чоросов (ОЭУ), 48 кг – Дима Чуприн (Горнай), 52 кг – Михаил Прокопьев (ОЭУ), 57 кг – Виталий Мордовской (Чурапчы), 62 кг – Игорь Тарасов, 80 кг – Никита Евсеев (иккиэн ОЭУ) кыайдылар.

21-гэр диэрис саастаах эдэрдэргэ: 57 кг – Данил Мохначевскай, 61 кг – Лев Павлов, 65 кг – Андрей Мидловец, 74 кг – Игорь Матвеев тэҥнээхтэрин булбатылар.

Улуус баһылыга Никита Андреев көҥүл тустуу сайдарыгар Петр Сивцев улахан оруоллааҕын, оҕону спорка угуйууга ыытар үлэтин сыаналаан туран, «Улуус сайдыытыгар кылаатын иһин» бэлиэнэн наҕараадалаата. Кини улахан дьиэ кэргэн аҕа баһылыгын (4 кыыс, 3 уол оҕолоох) быһыытынан улуус бигэ туруктаах буоларыгар кылаатын киллэрсэрин ахтан ааспыта оруннаах.

Бу маннык өрөспүүбүлүкэтээҕи таһымнаах күрэхтэһиилэр тыа сиригэр ыытыллалларыгар РФ Президенэ Владимир Путин национальнай бырайыак быһыытынан спорду өйүүр бырагырааммалара олоххо киирэн, киэҥ-куоҥ, сөптөөх усулуобуйалаах спортивнай объектар тутуллаллара буолар.

Вячеслав АЛЕКСЕЕВ.

Ааптар хаартыскаҕа түһэриилэрэ.