Сонуннар

Николай Кычкин кэриэһигэр турнир саҕаланна!

Россия үтүөлээх тренерэ Николай Николаевич Кычкин кэриэһигэр 100 харахтаах дуобакка Бүтүн Россиятааҕы 13-с турнирга дойду 4 регионуттан барыта 142 спортсмен кыттар. Ол курдук, бу сырыыга Башкортостан, Иркутскай уобалаһыттан, Красноярскай кыраайтан, Саха Республикатыттан күрэхтэһэллэр. Күрэхтэһиигэ 7 гроссмейстер, 13 маастар кыттар.

Күрэхтэһии үөрүүлээх аһыллыытыгар саалаҕа толору киһи муһунна. Оҕо-аймах элбэҕэ, спорт бу көрүҥэ кэскиллээҕин туоһулуур. Мустубут дьону Саха сирин физическэй култуураҕа уонна маассабай спорка управлениетын начальнига Роман Оконешников, Дуобат аан дойдутааҕы федерациятын бочуоттаах президенэ Владимир Птицын, Н.Н. Кычкин кэргэнэ, Россия уонна СР үтүөлээх тренерэ Мария Бырдыннырова эҕэрдэлээтилэр.

Россия, Европа, аан дойду элбэх чемпионнарын уонна призердарын иитэн-такайан таһаарбыт талааннаах тренер туһунан үтүө тыллар этилиннилэр, истиҥ ахтыылар оҥоһулуннулар.

Кэрэ бэлиэ түгэн буолан баран, наҕараадалааһыннаах буолла. Ол курдук, В.И. Птицын дуобат спордун өйөөччүлэргэ, көмөлөһөөччүлэргэ федерация аатыттан өйдөбүнньүк бэлэхтэри туттарда.

Үөрүүлээх түгэҥҥэ экраҥҥа Россия үтүөлээх тренерэ Николай Николаевич Кычкин туһунан кылгас документальнай киинэ көрдөрүлүннэ. Онно кини иитиллээччилэрэ, тренердэрин туһунан санаалара сиһилии көрдөрүлүннэ.

Кырдьык да, Саха сиригэр дуобат оонньуута аҥардас спорт эрэ көрүҥүн быһыытынан буолбакка, саха олоҕун биир быстыспат дьарыга диэххэ сөп. Тыйыс айылҕалаах Сахабыт сиригэр өбүгэлэрбититтэн утумнанан кэлбит мындыр оонньуу – киһи өйүн, ааҕыыны-суоттааһыны сайыннарар. Онон этэргэ дылы, оҕотуттан оҕонньоругар тиийэ хас ыал аайы дуобаттыыллара.

Ол да иһин, билигин спорт бу көрүҥэр үрдүк ааттаах спортсменнар, аан дойду, Европа, Россия чемпионнара иитиллэн таҕыстылар (15 гроссмейстер). Саха сирин дуобакка чемпионата 1930 сыллаахтан ыытыллар. Ылан көрдөххө, чуолаан дуобатчыттар билигин республикаҕа саамай элбэх мэтээли, кыайыыны-хотууну аҕалаллар. Онтон дуобат федерацията – республика биир үчүгэй үлэлээх общественнай тэрилтэтэ буолла.

Үөрүүлээх тэрээһини «Эрэл» үҥкүү театрын үҥкүүһүттэрэ, Аман Амхаров, Эллэй Васильев, Айса ылбаҕай ырыаларынан киэргэттилэр.

Күрэхтэһии бүгүҥҥүттэн Республикатааҕы Дуобат-саахымат киинигэр саҕаланна итиэннэ олунньу 24 күнүгэр түмүктэниэҕэ. Спортсменнарбытыгар ситиһиилээх кыттыыны баҕарабыт!

Петр ПАВЛОВ.

Ааптар хаартыскаҕа түһэриитэ.

Добавить комментарий

Ваш адрес email не будет опубликован. Обязательные поля помечены *

160224
Бүгүн : 124