История

Амма Өлөксөйүн архыыба тугу кэпсиирий?

Горнай улууһа ат сүүрүүтүгэр кэлиҥҥи сылларга кэккэ ситиһиилэрдээх. Биир чаҕылхай кыайыытын Эйр Бен Барс 2021 сыллаахха Бэрдьигэстээх ипподромугар тыһыынчанан киһи көрөн турдаҕына Манчаары оонньууларыгар ситиспитэ.

Онно тренеринэн Виталий Петров эрчийэн, бэйэтэ сүүрдэн аҕалбыта. Онтон Горнай улууһун сүүрүк аттара аан маҥнай хаһан сүүрбүттэрэй диэн үгүс киһи интириэһиргиир буолуохтаах. Бу илиибэр, өссө 1940 сыллардаахтан ат сүүрүүтүн программаларын муспут Алексей Георгиевич Алексеев-Амма Өлөксөйө архыыбын тутан олорон көрдөххө, аан маҥнай Горнай аатыттан 1970 сыллаахха Харылаах диэн тураҕас ат сүүрбүт. Оччолорго “Горнай” сопхуос аатыттан.

Кинини сүүрэр суолга Власов А.М. диэн киһи таһаарбыт. Бу дьиҥ архыыбынай дааннай этэринэн, сүүрүү муус устар 3 күнүгэр ыытыллыбыт. Амма Өлөксөйүн архыыба кэпсииринэн, биир интириэһинэй сүүрүү Харылаах сүүрүүтэн кэннэ, лоп курдук биир сыл буолан баран хатыламмыт. 1971 сыл муус устар 3 күнэ. 1600 миэтэрэ дистанцияҕа “Горнай” сопхуос үс сүүрүк аттара тахсаллар, үһүөн соҕурууттан кэлбит ыраас хааннаах сүүрүктэр: Аргументация, Сайга уонна Зарница.

Биир хамаанда, ол гынар тренердэрэ атын атыннар – Саввинов С.Г., Истомин В.Г. уонна Антипин А.И. Сүүрүүнү кугас дьүһүннээх Сайга кыайбыт. Манан көрдөххө, Горнай улууһугар ат сүүрүүтүнэн дьарыктаныан баҕалаах өссө 1960 сыллартан бааллара биллэр эбит.

Михаил Мордовской-Михута.

Добавить комментарий

Ваш адрес email не будет опубликован. Обязательные поля помечены *

137681
Бүгүн : 145