Сонуннар

Ярыгин-2024: Уолаттарбыт кимнээҕи кытта киирсэллэрий?

Икки төгүллээх олимпийскай чемпион Иван Ярыгин аатынан спортивнай тустууга норуоттар икки ардыларынааҕы турнир бастакы күнүгэр эр дьоҥҥо – 57, 61 уонна 70 кг ыйааһыннаахтар күөн көрсүөхтэрэ.

57 киилэҕэ барыта 36 бөҕөс сэрэбиэйи ааспыт. Кинилэртэн 8-һа биһиги бөҕөстөрбүт. Көрдөххө, Заур Угуевы уонна Рамиз Гамзатовы араарбыттар. Бу ыйааһыҥҥа россиялары тэҥэ – Беларусь, Индия, Узбекистан, Молдова, Кытай, Монголия бөҕөстөрө бааллар.

Үөһэ бөлөхтөн Угуевы, Чебодаевы, узбек Абдуллаевы, Тютрины, Мехтихановы бэлиэтиэххэ сөп.

Онтон аллараа бөлөххө биллиилээхтэртэн Гамзатов, Монгуш, Идрисов, монгол Нармандах бааллар. Ханныгын да иһин урукку ситиһии билигин ааҕыллыбат, ким үчүгэй бэлэмнээх, бу күҥҥэ күүстээх туруктаах, кыайыыга дьулуурдаах – ол кыайыаҕа.

Квалификация:

57 кг Уйгулан Иванов – А.Кочевой (Красноярскай), кыайбыта Н.Жуманазаровы (Узбекистан) кытта тустуоҕа.

57 кг Федор Постников – М.Мехтиханов (Дагестан), кыайбыта Х.Магомедовы (Дагестан) кытта киирсиэҕэ.

Финал 16/1-гэр:

57 кг Яков Павлов – Т.Караев (Ставрополь)

57 кг Арыйаан Тютрин – А.Чамзын (Тыва)

57 кг Александр Авелов – М.Самоил (Молдова)

57 кг Артём Слепцов – Ю Вей (Кытай)

57 кг Любомир Ашеин – М.Садулаев (Чечня)

57 кг Лев Павлов – М.Шавкатов (Узбекистан).

Иккис ыйааһыҥҥа сэрэбиэйи 27 бөҕөс ааспыт. Биһиэттэрэ – төрдүөлэр. Манна бөлөхтөр баһылыктарынан дагестанецтар А.Магомедовы уонна М.Мехтихановы таланнар, иккиэннэрин үөһээ уонна аллараа бөлөхтөргө араарбыттар.

Петр Константинов бастаан былырыын манна буолбут Россия эдэрдэргэ күрэхтэһиитин кыайыылааҕа, аан дойду призера Эльдар Ахмадудиновы кытта тустар буолбут.

Атын үс уолаттарбыт аллараа бөлөххө киирбиттэр. Састаап биир тэҥ күүстээх буолбут диэххэ сөп. Кими да сэниир табыллыбат.

Квалификация:

61 кг Петр Константинов – Э.Ахмадудинов (Дагестан)

61 кг Юлиан Григорьев – М.Икромов (Таджикистан)

61 кг Андрей Бекренев – К.Монгуш (Иркутскай).

Финал 8/1-гэр:

61 кг Андрей Мидловец – Д.Тахтаров/А.Расулов кыайыылааҕын кытта көрсүө.

70 киилэҕэ – 36 бөҕөс күөн көрсөр. Манна Иналбек Шериевы уонна Курбан Шираевы, бастыҥнарынан ааҕан араарбыттар диэххэ сөп.

Биһиги бөҕөстөрбүт Константин Капрынов уонна Олег Фомин сэрэбиэй быһыытынан хара бастакыттан бэйэ-бэйэлэрин кытта көрсөр буолбуттар. Хайалара кыайбыта салгыы эргииргэ Евлоев (Азербайджан) – Секинаев (Осетия) хоппутун кытта көрсүөҕэ. Онтон Владимир Бояновскай уонна Айсен Потапов иккис бөлөххө киирбиттэр.

Ылан көрдөххө, үөһэ бөлөххө Шериев, Топшиноев, Сат, Балтуев, Капрынов курдук биллэр бөҕөстөр бааллар. Онтон аллараа бөлөхтөн Шираевы, Упхоевы, Казырыгы уонна Потаповы чорботуохха сөп. Чэ, ким күүстээҕин көбүөр көрдөрүө. Этэргэ дылы, биһиги сылыктыыбыт, онтон ким дьиҥ күүстээҕин түһүлгэ таҥарата бэйэтэ быһаарыа.

Квалификация:

70 кг Владимир Бояновскай – М.Ахмедов (Таджикистан)

Финал 16/1-гэр:

70 кг Константин Капрынов – Олег Фомин

70 кг Айсен Потапов – Д.Кривов (Калининград).

Кылгастык бөҕөстөрбүт кимнээҕи кытта тусталларын билиһиннэрдэххэ итинник. Көрө-билэ сылдьаргыт курдук, быйылгы түһүлгэҕэ опыттаах бөҕөстөрү тэҥэ сүрүннээн, эдэр кэскиллээх уолаттар күүстэрин холоноллор.

Ханныгын да иһин, уолаттарбытыгар ситиһиилээх тустууну баҕарабыт. Турнир бастакы күнэ Дьокуускай бириэмэтинэн күнүс 13:00 чаастан саҕаланар.

Петр ПАВЛОВ.

 

 

Добавить комментарий

Ваш адрес email не будет опубликован. Обязательные поля помечены *

137693
Бүгүн : 157