Сонуннар

Ярыгин-2024: Тустуу иккис күнүгэр…

Красноярскай. Бүгүн, «Иван Ярыгин Кубога» спортивнай тустууга норуоттар икки ардыларынааҕы турнир иккис күнэ.

Эр дьоҥҥо бүгүн 65, 79 уонна 125 кг ыйааһыннаахтар күрэхтэһиини саҕалыыллар.

65 кг икки кыттааччылаахпыт. Иккиэн сэрэбиэй быһыытынан үөһэ бөлөххө түбэспиттэр. Ньургун Скрябин квалификацияҕа дагестанец Д.Абдулкадыровтыын тустуоҕа. Онтон республика саҥа чемпиона Дьулусхан Тотонов күрэхтэһиини О. Анзин диэн Красноярскай бөҕөһүн кытта киирсиинэн саҕалыаҕа.

79 киилэҕэ маннык улахан таһымнаах түһүлгэҕэ маҥнайгытын сүрэхтэнэр Саха сирин быйылгы чемпиона Роман Николаев бастакы эргииргэ А.Соколаев диэн Хотугу Осетия бөҕөһүн кытта тустуоҕа.

Саамай ыарахан ыйааһыҥҥа Никита Хабаров күрэхтэһиини финал 16/1-тэн саҕалыыр. Кини утарсааччыта – турок Х.Бюйюксингил.

Маны тэҥэ бүгүн, бэҕэһээ күрэхтэһиини саҕалаабыт ыйааһыннарга үһүс бириистээх миэстэ иһин кимнээх кыттыахтарын сөбүн сүүмэрдээһиҥҥэ, атыннык эттэххэ «уоскутар» бөлөххө дьахталларга уонна эр дьоҥҥо барыта алта спортсмеммыт кыттыаҕа. Ону тэҥэ Арыйаан Тютрин уонна Айсен Потапов аччыгый финалынан ааттанар, турнир боруонса мэтээлин иһин киирсиэхтэрэ.

Бүгүҥҥү хапсыһыылар Дьокуускай бириэмэтинэн күнүс 13:00 чаастан саҕаланаллар. Спортсменнарбытыгар ситиһиилээх кыттыыны баҕарабыт. Күрэхтэһии хаамыытын биһиги сайтпытыгар кэтээн көрөргүтүгэр ыҥырабыт.

«Дьулурҕан».   

Добавить комментарий

Ваш адрес email не будет опубликован. Обязательные поля помечены *

137685
Бүгүн : 149