Сонуннар

Ярыгин-2024: Никита Хабаров кубинеһы кыайда

Красноярскай. «Иван Ярыгин Кубога» спортивнай тустууга норуоттар икки ардыларынааҕы XXXV турнир үһүс күнэ. Күрэхтэһии «санааны көтөҕөр» бөлөх тустуутунан саҕаланна. Бүгүн эр дьон 74, 92, 97 кг ыйааһыннаахтар күрэхтэһиини саҕалыыллар.

Санатан эттэххэ, быйылгы турнирга 24 дойду спортсменнара күөн көрсөллөр: Россия, Азербайджан, Албания, Аргентина, Армения, Беларусь, Венесуэла, Грузия, Иран, Индия, Казахстан, Кытай, Куба, Кыргызстан, Молдова, Монголия, Румыния, Сирия, Таджикистан, Туркменистан, Турция, Узбекистан, Корея, Эквадор.

Ыарахан ыйааһыҥҥа финалга тахсыбыт А.Хизриевка хотторбуттар бөлөхтөрүгэр бастаан кубинец Торрес – Гришины (Воронеж) 2:1 ахсаанынан хотто. Онон салгыы эргииргэ Никита Хабаров кубинецтыын көрүстэ. Итиэннэ 4:0 ахсаанынан кыайыыны ситистэ. Хабаров – Торрес тустууларын Дьулурҕан ютуб каналыгар көрүөххүтүн сөп.

Бу бөлөххө Остап Пасенок (Кемерово) бэҕэһээ А.Хизриевы кытта туста сылдьан эчэйии ылбытын туһунан биллэрбиттэрэ. Онон кини эчэйиитэ халымыр соҕус буоллаҕына, турнир боруонса мэтээлин иһин Никита Хабаровтыын тустуоҕа. Онтон эчэйиитэ улахан буоллаҕына, биһиги бөҕөспүт бу кубинеһы хотуута мэтээлгэ тиэрдиэн сөп.

Барытын билэн-көрөн иһиэхпит. Биһиги сайтпытын кэтээн көрө сылдьаргытыгар баҕарабыт.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *

137686
Бүгүн : 150