Сонуннар

Ярыгин-2024: Красноярскай түһүлгэтигэр сахалар

Бүгүҥҥүттэн Красноярскайга спортивнай тустууга “Иван Ярыгин Кубога” норуоттар икки ардыларынааҕы турнир саҕаланна. Бу күрэхтэһиигэ Саха сириттэн барыта 29 спортсмен кыттар. Дьулурҕан сайтыгар саха спортсменнарын кыттыыларын салгыы билиһиннэрэбит.

Спортсменнары тэҥэ бу улахан таһымнаах эппиэттээх түһүлгэҕэ биһиги судьуйаларбыт үлэлэһэ сылдьалларын санатар тоҕоостоох. Ол курдук, норуоттар икки ардыларынааҕы категориялаах судьуйа Николай Николаев уонна Россиятааҕы категориялаах судьуйа Вячеслав Кривошапкин көбүөргэ тахсан тустуулары сууттаатылар.

Спортсменнарбыт тустууларын СР физическэй култуураҕа уонна спорка министрэ Леонид Спиридонов, СР Спорка бэлэмнэнии киинин дириэктэрэ Михаил Пахомов кыраҕытык кэтээн көрө сылдьаллар.

Бастакы хапсыһыылары көрөн баран эттэххэ, эчэйии кэнниттэн сыл аҥара кэриҥэ кэмҥэ күрэхтэспэтэх Арыйаан Тютрин бастакы эргииргэ сэргэх тустууну көрдөрбүтүн бэлиэтиэххэ сөп. Кини Тыва биир күүстээх эдэр бөҕөһүн Амыр Чамзыны маҥнайгы түһүмэххэ очукуонан ыраастык кыайда. Син уруккутун курдук сытыы, кимиилээх тустууну ыытта. Салгыы күрэхтэһиигэ Арыйаан узбек Жуманазаровы кытта тустуоҕа.

Хамаанда хапытаана Константин Капрынов бэҕэһээ эрчиллии кэмигэр эчэйии ылан, күрэхтэһииттэн туораабытын туһунан иһитиннэрдилэр. Онон Олег Фомин бастакы эргииргэ быһа кыайыыны сурунна. Аны финал 16/1-гэр кини осетин Секинаевы кытта киирсэр буолла.

Биир эрэнэр, кэтэһэр бөҕөспүт Лев Павлов бастакы киирсиитигэр Узбекистан бөҕөһүн баһыйа тутта. Онон маннык улахан таһымнаах күрэхтэһиини кыайыынана саҕалаата.

Саха спортсменнарын тустуулара:

61 кг Петр Константинов – Э.Ахмадудиновка (Дагестан) 1:2

57 кг Арыйаан Тютрин – А.Чамзыны (Тыва) 10:0

57 кг Уйгулан Иванов – Н.Жуманазаровка (Узбекистан) 1:3

70 кг Олег Фомин – К.Капрынов + – эчэйии

57 кг Александр Авелов – М.Самоил (Молдова) + –

57 кг Артём Слепцов – Лины (Кытай) 7:4

61 кг Юлиан Григорьев – М.Икромовка (Таджикистан) 0:10

61 кг Андрей Бекренев -К.Монгушка (Иркутскай) 7:10

59 кг Евгения Огородникова – А.Сидельниковаҕа (Кемерово) 4:8

70 кг Айсен Потапов – Д.Кривовы (Калининград) 7:4

57 кг Любомир Ашеин – М.Садулаевка (Чечня) 0:6

57 кг Лев Павлов – М.Шавкатов (Узбекистан) 3:1.

Күрэхтэһии салҕанан бара турар. Тустуу түмүктэрин биһиги dzulurgan.ru сайтпытыгар кэтээн көрө сылдьаргытыгар.

Петр ПАВЛОВ.  

Добавить комментарий

Ваш адрес email не будет опубликован. Обязательные поля помечены *

137681
Бүгүн : 145