Сонуннар

Ярыгин-2024: Финалистар кимнээҕий?

Красноярскай. «Иван Ярыгин Кубога» спортивнай тустууга норуоттар икки ардыларынааҕы турнир бастакы күнэ түмүктэннэ. Финалга кимнээх тусталлара билиннэ.

Эрдэ иһитиннэрбиппит курдук, финалга тахсар иһин киирсиилэргэ биһигиттэн Арыйаан Тютрин уонна Айсен Потапов кытыннылар. Хомойуох иһин, кинилэр хотторон кэбистилэр. Ол курдук, Тютрин – олимпийскай чемпион Заур Угуевка 1:3, онтон Потапов – Европа экс-чемпиона Курбан Шираевка 0:5 ахсааннарынан сабырыйтардылар.

Онон сарсын Тютриннаах Потапов үһүс бириистээх миэстэ иһин тустар буоллулар. Ону тэҥэ Федор Постников, Яков Павлов (57 кг) турнир боруонса мэтээлин иһин «уоскутар» бөлөххө кыттыахтара.

Финалга көрсүөхтэрэ:

57 кг Заур Угуев – Муса Мехтиханов (иккиэн – Дагестан)

61 кг Абасгаджи Магомедов – Муслим Мехтиханов (иккиэн – Дагестан)

70 кг Иналбек Шериев (Москва уоб.) – Курбан Шираев (Дагестан).

Көрөргүт курдук, бастакы күн түмүгүнэн Дагестан хамаандата күннээтэ. Финалга тахсыбыт алта киһиттэн – биэһэ дагестанецтар. Кинилэртэн ини-бии Муса уонна Муслим Мехтихановтар бастакы миэстэ иһин киирсиэхтэрэ. Бу бөҕөстөр финалга тахсаллара сылыктааһын быһыытынан эрдэттэн биллэр этэ. Бары эрдэттэн күүстээхтэринэн биллэн, сэрэбиэйгэ сетка үөһээ уонна аллараа өттүлэригэр араарыллыбыттара. Арай, 57 киилэҕэ Рамиз Гамзатов финалга тахсыа дии санаабытым туолбата.

50 кг Мунхбат Мунхбат (Монголия) – Мария Тюмерекова (Россия)

55 кг Хулан Батхуяг – Отгонтуя Баянмунх (иккиэн – Монголия)

59 кг Анастасия Сидельникова (Россия) – Сумия Эрденечимег (Монголия)

65 кг Амина Танделова – Динара Кудаева (иккиэн – Россия).

Онтон дьахталлар тустууларыгар Александра Копылова, Александра Карамзина (50 кг), Севиль Назаров (55 кг) уонна Евгения Огородникова (59 кг) сарсын “уоскутар” бөлөххө киирэн салгыы киирсиэхтэрэ. Онон бастакы күн түмүгүнэн ааҕан көрдөххө, аҕыс спортсмеммыт салгыы мэтээл иһин тустар кыахтаах.

Сарсын күрэхтэһии күнүс 13:00 чаастан саҕаланар. Бастаан дьахталларга уонна эр дьоҥҥо “уоскутар” бөлөх тустуулара буолуохтара. Онтон тута эр дьоҥҥо – 65, 79 уонна 125 кг ыйааһыннаахтар барыллааһын киирсиилэрэ ыытыллыаҕа.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *

199047
Бүгүн : 338