Сонуннар

Василий Егоров – Россия Кубогын кыайыылааҕа!

Самара куоракка икки төгүллээх олимпийскай чемпион Олег Саитов аатынан Россия боксаҕа Кубога биэс күн ыытыллан түмүктэннэ.

Спорду таптааччылар, боксаны сэҥээрээччилэр ити күннэр усталарыгар этэргэ дылы, туох баар болҕомтолорун ууран, харахтарын хатаан, билиҥҥи кэмҥэ тумус туттар боксёрбут Василий Егоров киирсиилэрин көтүппэккэ көрдүлэр-иһиттилэр.

Уолбут, дьон-сэргэ итэҕэлин, эрэлин түһэн биэрбэтэ. Бастаан Россия экс-чемпиона Расул Салиевы (Дагестан), онтон Россия чемпионатын призёра Артур Нагапетяны (Москва) кыайталаата.

Бүтэһик быһаарыылаах киирсиигэ, били былырыын Россия чемпионатыгар сабырыйтарбыт киһитин, норуоттар икки ардыларынааҕы кылаастаах спорт маастара Баир Батлаевы үс раунд тухары туох да мөккүөрэ суох баһыйа тутан, билигин да үчүгэй таһымҥа сылдьарын көрдөрдө.

PS: Василий кыайыылаах киирсиитин бу видеоттан өссө төгүл көрөн дуоһуйууну ылыаҕыҥ!

Итинэн, Василий Егоров ситиһиилээх кыттыытынан биир дойдулаахтарын, Бүтүн Саха сирин олохтоохторун сүрдээҕин үөртэ, сэргэхситтэ. Өссө төгүл бастыҥ боксёр буоларын көрдөрдө. Эҕэрдэ уонна Махтал!

Кырдьык да Вася Егоров төһө да билигин 30 сааһыгар сырыттар, улахан таһымнаах киирсиилэри көрдөрөр. Уонна Россияҕа 51 киилэҕэ бастакы нүөмэр буоларын өссө төгүл дакаастаата. Бу кыайыытынан аны Европа чемпионатыгар кыттыахтаах. Батлаевка былырыын сабырыйтарбыта, быйыл сөптөөх тактиканы тутуһан кииристэ. Ити кини спорка айымньылаахтык сыһыаннаһарын, улахан таһымнааҕын көрдөрөр.

Василий, кытаат!

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *

137676
Бүгүн : 140