Сонуннар

Уус алданнар чемпионаты үрдүк таһымнаахтык тэрийдилэр

Уус Алдан улууһун киинигэр Бороҕоҥҥо, саҥа тутуллан үлэҕэ киллэриллибит Спорт дыбарыаһыгар икки күн устата Н.Н. Тарскай аатынан көҥүл тустууга Саха сирин биирдиилээн уонна хамаанданан бастыыр иһин чемпионата үрдүк тэрээһиннээхтик ыытыллан түмүктэннэ.

Тустууга быйылгы чемпионат спорт биллиилээх, талааннаах салайааччыта Николай Николаевич Тарскай төрөөбүтэ 100 сылыгар ананан ыытыллыбытынан уратылаах.

Сүрүн тэрээһин төһө даҕаны үс эрэ күн ыытылыннар, бу улахан таһымнаах дьаһалга бэлэмнэнии олох эрдэттэн саҕаламмыта. Республикаҕа уонна улууска анал хамыыһыйалар тэриллэннэр, хас биирдиилэрэ бэйэлэрин салааларыгар кыһамньылаахтык сыһыаннаһан – сүктэриллибит итэҕэллэрин, туруоруммут соруктарын ситистилэр диэххэ сөп.

Икки күн устата дыбарыаска икки этээһинэн быыстапкалар туруоруллан, үбүлүөйдээх тэрээһин силигин ситэрэн биэрдилэр. Саҥа тутуу үлэһиттэрэ гардеробтан саҕалаан дьону көрсүүгэ, дьиэни-уоту тутатына ыраастааһыҥҥа, сууйууга-тарааһыҥҥа бары саба түһэн – спортсменнар, көрөөччүлэр  үчүгэй өйдөбүллээх буолалларын инниттэн – сылаас, ыраас, сырдык усулуобуйаны олохтоотулар. Аны, чемпионат тэрээһинигэр анаан волонтердар бөлөхтөрө тэриллэн үлэлээбитин бэлиэтиир тоҕоостоох.

Онтон чемпионаты бэлэмнээн уонна тэрийэн ыытар улуус буолалларынан – кыайыылаахтарга уонна бастыҥнарга элбэх ахсааннаах сиэдэрэй бириистэри олохтообуттарын этэ да барыллыбат.

Маннык улахан таһымнаах тэрээһин биир улахан боппуруоһунан биллэн турар, дьону аһатыы-сиэтии буолар. Маныаха үөрүйэхтээх тэрилтэлэри кытта дуогабардаһан, чемпионат саҕаланыаҕыттан бүтүөр диэри саалаҕа дьону аһатыы-сиэтии тэрилиннэ. Ол курдук, урбаанньыт С.Н. Портнягина уонна «Сайын» маҕаһыын (Н.Э. Дьяконов) үлэһиттэрэ дьону тото-хана аһаттылар.

Онон Уус Алдан бары олохтоохторугар, улуус салалтатыгар, спорка тэрилтэтигэр, Спорт дыбарыас үлэһиттэригэр – чемпионаты миэстэтигэр үрдүк таһымнаахтык тэрийэн ыыппыттарыгар барҕа махтал!  

Петр ПАВЛОВ.

Ааптар хаартыскаҕа түһэриитэ.     

Добавить комментарий

Ваш адрес email не будет опубликован. Обязательные поля помечены *

137684
Бүгүн : 148