Сонуннар

Тарскай-2024: Сылы саҕалыыр чемпионаты үрдүк таһымнаахтык…

Тохсунньу 4-6 күннэригэр Уус Алдан улууһун киинигэр Бороҕоҥҥо, Н.Н. Тарскай кэриэһигэр көҥүл тустууга Саха Республикатын биирдиилээн уонна хамаанданан бастыыр иһин чемпионата ыытыллар.

Манан сибээстээн Бороҕоҥҥо саҥа тутуллан үлэҕэ киллэриллибит Н.Н. Тарскай аатынан спорт дыбарыаһын салайааччыта Константин Давыдовтан чемпионат тэрээһинин туһунан ыйыталастыбыт:

-Улууспутугар анал хамыыһыйа тэриллэн эрдэттэн бэлэмнэнэр үлэлэр саҕаламмыттара. Тустуу икки көбүөрүнэн буолуоҕа уонна бастакы этээскэ манежка биир эрчиллэр көбүөр тэлгэниэ. Онно телевизордар быһа холбонон эмиэ көстө туруохтара. Кыттааччылар ону көрө сылдьан, ким хаһан туста киирэрин, ыҥырылларын билиэхтэрэ.

Чемпионакка киирии – билиэттээх. Күҥҥэ 300 солкуобай, эбиэккэ диэри – 150, эбиэттэн киэһэ – 150 солк. Интернети НВК-лар “Ростелекомҥа” сайаапкалаабыттара. Интернет үчүгэй диэххэ сөп. Манна мас-рестлиҥҥэ республика күрэхтэһиитин тэрийбиппитигэр, интернет үчүгэй этэ. НВК-лар кэлэллэр, тустууну быһа көрдөрүөхтэрэ. Итиэннэ ютуб каналынан эмиэ быһа биэрии баар буолуоҕа. Буфет саалаҕа бэйэтигэр үлэлиэҕэ. Кэлбит дьону барытын хааччыйыа дии саныыбын.

Төһө көрөөччү киирэн олорон көрүөй диэтэххэ, куораттан, “Дохсун” спортивнай комплекстан (А.Андреев) спорт министиэристибэтэ көҥүллээн, хомуллар трибуналары аҕалбыппыт. Онон бэйэбит киэнин эбэн, быһа холуйан 700 киһи олорон көрөр усулуобуйатын бэлэмнээтибит. Элбэх ыҥырыылаах ыалдьыттар кэлэллэрэ күүтүллэр. Суруналыыстар үлэлиир усулуобуйаларын тэрийиэхпит.

Барыта 150-чэ тустуук кэлэрэ сабаҕаланар. Чемпионат кэмигэр Николай Николаевич Тарскай 100 сылынан быыстапка туруо. Күрэхтэһии ыытыллар сирин Саха сирин физическэй култуураҕа уонна маассабай спорка управлениетын начаалынньыга Роман Оконешников салайааччылаах бөлөх кэлэн көрөн-истэн, билсэн, сүбэ биэрэн барбыта.

Биир дойдулаахпыт Н.Н Тарскай төрөөбүтэ 100 сылыгар анаммыт 2024 сылы саҕалыыр чемпионаты үрдүк таһымнаахтык бэлэмнээн, тэрийэн ыытарга кыһаллабыт.

Петр Павлов.     

Добавить комментарий

Ваш адрес email не будет опубликован. Обязательные поля помечены *

201722
Бүгүн : 5