Сонуннар

Тарбах тардыһыахха эрэ!

Мин 2017 сылтан республикатааҕы Манчаары аатынан спорт сахалыы көрүҥнэригэр киинин 1-Хомустаахтааҕы филиалыгар мас тардыһыы тренеринэн үлэлиибин.

2018 сыллаахха биир киһи тарбаҕын дьарыктыырыгар «Эспандер» диэн тренажеру оҥорбутум. Онтон тарбаҕы үчүгэйдик сайыннарарга «Тарбах тардыһыы» тренажеру айбытым. Бу тренажер уратыта диэн, икки киһи утарыта олорон тарбах тардыһаллар. 2023 сыллаахха «Тарбах тардыһыы» тренажербун сайыннаран, патент ылары ситиспитим.

Бу тренажер тарбах күүһүн, уһуннук тутан киирсэллэрин сайыннарар. Кыра оҕолорго бастаан спорка үктэнэллэригэр саамай наадалаах дии саныыбын. Мантан характер, күүс, уһуннук киирсэллэрэ сайдар. Эбиитин мас тардыһыы эрэ буолбакка, тустууктарга, хапсаҕайдьыттарга, самбистарга уонна атын көрүҥнэргэ наадалаах дии саныыбын. Ону таһынан детсад оҕолоруттан саҕалаан – оскуола оҕолоро, эдэр ыччат, кырдьаҕастар туттуохтарын сөп. Дьоҕус, чэпчэки буолан, айаҥҥа илдьэ сылдьарга үчүгэй тренажер.

«Тарбах тардыһыы» тренажерунан дьарыктанан, Бүтүн Россиятааҕы, республикатааҕы уонна улуустааҕы күрэхтэһиилэргэ дьарыктыыр оҕолорум ситиһиилээхтик кытыннылар. Ол курдук, Чичигинарова Вера – “Кубок Кавказа” чемпионката, Первенство России среди студентов” – 2 миэстэ, Обутов Эдуард – хас да төгүллээх Республика призера, Первенство России кыттыылааҕа, Замаратский Алеша уонна Охлопкова Влада – Саха сирин үөрэнээччилэрин спартакиадатын призердара, Бүтүн Россиятааҕы Анапа куоракка ыыттыллыбыт күрэхтэһии призердара…

Дьарыктыыр уолум Мамаев Айаал Москва куоракка тарбах тардыһыы туһунан дакылаат суруйан, «Вернадские чтения» 1 степеннээх дипломант буолбута. Уфа куоракка научнай конференцияҕа «Тарбах тардыһыы» тренажербун сырдаппытым. 2023 сыллахха бэс ыйыгар оҕолорго Мадьыны ыһыаҕар уонна Хомустаах Бастакы нэһилиэгин ыһыаҕар күрэхтэһиилэри ыыппытым. Булуҥ, Нам, Алдан улуустарыгар Образовательнай экспедиция иһинэн, тарбах тардыһыыга маастар-кылаас ыыппытым.

Ахсынньы 20 күнүгэр Хомустаах Бастакы нэһилиэгэр түөлбэлэр икки ардыларыгар бэрт сонун, сэргэх «Тарбах тардыһыы» күрэхтэһиитэ буолан ааста. Инникитин «Тарбах тардыһыы» киэҥ эйгэҕэ спортивнай күрэхтэһии курдук тахсыа диэн эрэнэбин.

Станислав СОЛОВЬЕВ.

Нам улууһа.  

Добавить комментарий

Ваш адрес email не будет опубликован. Обязательные поля помечены *

137682
Бүгүн : 146