Сонуннар

Спорт түмтэ

Сахабыт сиригэр Физкультурнай хамсааһын 100 сылынан Хаҥалас улууһугар тохсунньу 19  күнүгэр үөрүүлээх тэрээһин ыытылынна. Тэрээһин «Спорт түмэр!» спортивнай композициянан саҕаланна.

Манна тхэквондо, дзюдо, көҥүл тустуу, бокс көрүҥнэрин, Хаҥаластааҕы Оҕо спортивнай оскуолатын иитиллээччилэрэ көрдөрдүлэр. Үөрүүлээх тэрээһини улуус баһылыга Олег Иринеев эҕэрдэ тылынан арыйда уонна Хаҥалас улууһугар оройуоннааҕы спорт кэмитиэтин бэрэссэдээтэллэринэн үлэлээбит салайааччыларга түөскэ кэтиллэр бэлиэлэри туттарда.

Салгыы, Саха Өрөспүүбүлүкэтин спорка уонна физическэй культураҕа миниистирэ, биир дойдулаахпыт Леонид Спиридонов эҕэрдэтин тиэртэ. Кини  ытыктабыллаах дьоммутун, өрөспүүбүлүкэбитигэр физкультурнай хамсааһын атаҕар туруутугар, сайдыытыгар үтүөлэрин иһин, «Саха Өрөспүүбүлүкэтигэр физкультурнай хамсааһын 100 сыла» үбүлүөйүнэй түөскэ кэтиллэр дьоһуннаах бэлиэлэринэн наҕараадалаата. Юридическай наука дуоктара, РФ уонна СӨ үтүөлээх юриһа, Ил Түмэн 2-с, 3-с, 4-с уонна 5-с ыҥырыылаах мунньахтарын дьокутаата, «Сахаада-спорт» Ассоциация бэрэсидьиэнэ, сахалыы атах оонньууларыгар, ох саанан ытыыга РФ уонна РСФСР спордун маастара Александр Ким-Кимэн, Хаҥалас улууһун 1991-1992 сс. спорт кэмитиэтин бэрэссэдээтэлинэн үлэлээбит Валерий Федоров, Ил Түмэн дьокутаата Тихон Скрябин уонна улуустааҕы Мунньах бэрэссэдээтэлэ Анатолий Антонов кыттыыны ыллылар тыл эттилэр, наҕараада туттардылар.

Николай Иванов дириэктэрдээх Хаҥалас улууһун Оҕо спортивнай оскуолатын 2023 сыл түмүгүнэн 10 бастыҥ иитиллээччилэрэ ааттаннылар. Улуус үөрэҕин салаатын салайааччыта Павел Аргунов бастыҥ спортсменнары наҕараадалаата.

Салгыы Хаҥалас улууһун спорка уонна физическэй культураҕа управлениятын салайааччыта Виталий Прокопьев «Күөн көрсүү көрүҥнэригэр олимпийскай эрэллэр Спортивнай оскуолаларын» бастыҥ спортсменнарын, Покровскай куорат баһылыга Петр Гермогенов бастыҥ спорт тэрийээччилэрин, спонсордары уонна спортсменнары итиитик-истиҥник эҕэрдэлээтилэр, наҕараадалаатылар.

Тэрээһин түмүк чааһыгар, улууспут баһылыга Олег Иринеев «Хаҥалас улууһугар спорт 100 сылыгар Бастыҥ спортсмен» номинацияны ааттаах-суоллаах дьоммутугар, улахан кыайыылардаах спортсменнарбытыгар, боксаҕа ССРС спордун маастарга кандидатыгар, РФ кик-боксиҥҥа норуоттар икки ардыларынааҕы кылаастаах маастарыгар Константин Тимофеевка, ССРС спордун буоксаҕа маастарыгар Юрий Федоровка, көҥүл тустууга норуоттар икки ардыларынааҕы кылаастаах спорт маастарыгар, Саха Өрөспүүбүлүкэтин физическэй культураҕа уонна спорка үтүөлээх үлэһитигэр, Спорт миниистиригэр Леонид Спиридоновка, хайыһарга РФ спордун маастарыгар Дмитрий Егоровка, спортивнай гимнастикаҕа сахалартан бастакы ССРС спордун маастарыгар, кик-боксиҥҥа норуоттар икки ардыларынааҕы кылаастаах спорт маастарыгар Светлана Константиноваҕа, самбоҕа РФ спордун маастара, дзюдоҕа уонна пауэрлифтиҥҥэ спорт маастарыгар кандидакка Ринат Жангировка, РФ уонна СӨ спордун маастарыгар Егор Филипповка, ох саанан ытыыга РФ спордун маастарыгар Анна Стасова-Алексееваҕа дохсун ытыс тыаһын ортотугар туттарда.

Спорт сомоҕолуур ураты күүстээх. Этэргэ дылы, уруккулаах буоламмыт – бүгүҥҥүбүт баар, бүгүҥҥүлээх буоламмыт – инникибитигэр кэскиллээхпит!

Уйбаан УЙГУУРАП. Покровскай.

Ааптар хаартыскаҕа түһэриилэрэ.

Добавить комментарий

Ваш адрес email не будет опубликован. Обязательные поля помечены *

199035
Бүгүн : 326