Сонуннар

Кыайыылаахха бирииһэ туттарылынна

Эрдэ иһитиннэрбиппит курдук, Н.Н. Тарскай аатынан көҥүл тустууга республика чемпионатыгар сыһыаннаан спорду таптааччыларга анаан тэрийбит, кыайыылаахтары билгэлиир куонкуруспутугар 38 киһи кытынна. Кыайыылааҕынан Дьокуускайтан спорт маастара Андрей Александров таҕыста.

Кини – 7 чемпиону уонна кыайыылаах хамаандалары сөпкө сылыктаан, барыта 10 очукуону хомуйан, атыттартан чорбойдо.

Салгыы миэстэлэри Айаар, Айсен Молуков, Наталья Александрова, Татьяна Хомподоева, Егор Капитонов ыллылар. Кинилэр 8-тыы очукуолаахтар. Онтон Кирилл Киренскэй уонна Стас Сата 7-лии очукуону хомуйдулар.

Кыайыылаахха Саха Республикатын физическэй култуураҕа уонна спорка министиэристибэтэ туруорбут, Саха сиригэр физкултуура хамсааһына саҕаламмыта 100 сылыгар ананан тахсыбыт «История физической культуры и спорта Якутии» диэн суруналыыс Родион Кривогорницын бэлэмнээн таһаарбыт саҥа кинигэтэ туттарылынна. Бирииһи СР физическэй култуураҕа уонна спорка миниистирин солбуйааччы Гаврил Мохначевскай туттарда.

Түгэнинэн туһанан, куонкурус кыайыылааҕар бириис туруорбут СР физическэй култуураҕа уонна спорка министиэристибэтигэр уонна прессаны кытта үлэҕэ сыһыаннаах Астра Скрыбыкинаҕа махтанабыт!

Аны тохсунньу 24-28 күннэригэр Красноярскайга буолар Иван Ярыгин кубогар анаан куонкурус тэрийэргэ сананабыт. Спорду таптааччылар, тустууну сэҥээрээччилэр бэлэмнэнэн, биһиги сайтпытын кэтии сылдьыҥ.

«Дьулурҕан».

Добавить комментарий

Ваш адрес email не будет опубликован. Обязательные поля помечены *

186572
Бүгүн : 276