Сонуннар

Константин Власов – республика 7 төгүллээх чемпиона!

Бороҕоҥҥо ыытыллан түмүктэммит Саха Республикатын 2024 сыллааҕы көҥүл тустууга биирдиилээн уонна хамаанданан бастыыр иһин чемпионатыгар Олег Фомин, Константин Власов, Никита Софронов уонна Никита Хабаров былырыыҥҥы ситиһиилэрин хатылаатылар.

Манна даҕатан эттэххэ, бу чемпионат түмүгүнэн Константин Власов – көҥүл тустууга Саха сирин 7 төгүллээх чемпионунан буолла. Итинэн кини республика тустууга 7-лии төгүллээх чемпионнара: Василий Румянцевы, Максим Сибирякову, Николай Гоголевы, Анатолий Константинов, Герман Контоевы, Анатолий Андреевы, Дмитрий Шадрины кытта көрдөрүүтүнэн тэҥнэстэ.

Ити курдук, быйылгы күрэхтэһии түмүгүнэн Айсен Потапов уонна Никита Хабаров – 3-түү, Олег Фомин, Максим Толмачев уонна Никита Софронов – 2-лии төгүллээх чемпионнарынан буоллулар.

Мэҥэ Хаҥаластан төрүттээх спорт маастара, 29 саастаах Константин Власов (тренердэрэ Н.П. Сивцев, Д.Р. Неустроев) Тойон Мүрү түһүлгэтигэр утуу-субуу Н.Борисовы (Уус Алдан) 11:0, А.Ленскэйи (Орто Халыма) 4:1 уонна финалга В.Ефремовы (Чурапчы) 7:2 ахсааннарынан кыайталаата. Кини Ленскэйи уонна Ефремовы кытта тустууларын Дьулурҕан ютуб каналыгар көрүөххүтүн сөп.

Константин билигин дойдутугар, Аллараа Бэстээххэ «Парус» спортивнай комплекска тренеринэн үлэлиир.

Петр Павлов.

Ааптар хаартыскаҕа түһэриитэ.  

Добавить комментарий

Ваш адрес email не будет опубликован. Обязательные поля помечены *

201743
Бүгүн : 26