Сонуннар

Ил Дархан Кубога: Дмитрий Кокарев инники таҕыста

Бэҕэһээ, өрөбүл күн Ил Дархан саахымакка Кубогар алтыс туур оонньонно. Опыттаах гроссмейстер Дмитрий Кокарев 5,5 очколаах инники таҕыста. Кини республика икки төгүллээх чемпионун, 18 саастаах эдэр кэскиллээх оонньооччу Денис Назаровы кыайда.

Киин куорат 17-с оскуолатын үөрэнээччитэ Владислав Жирков Арассыыйа 2023 с. чемпионун Баира Кованованы баһыйа тутта. Иккис миэстэҕэ 5 очколаах Дмитрий Кряквин иһэр.

Күн бүгүн икки лидердэр көрсүһүүлэрэ интэриэһи үөскэтиэ. Алта оонньооччу 4,5 очколаах тилэх баттаһар.

Бүгүн Алексей Придорожный – Владислав Жирков, Денис Назаров – Антон Шомоев, Алексей Гребнев – Альберт Постников утарыта олоруохтара.

4 очколаах Баира Кованова, Олег Рычков, Дьокуускайтан Роман Ганжуров, Дмитрий Егоров уонна Арсений Чумаевскай чугас иһэллэр.

Субуота күн блиц-турнир ыытыллыбытыгар, 80 киһиттэн Алексей Придорожнай, Олег Рычков, Владислав Жирков инники таҕыстылар. Николай Капитонов Чурапчыттан, Денис Назаров Майаттан, Вячеслав Гаврильев Дьокуускайтан ситиһиилээхтик кытыннылар.

Оонньуу түмүктэнэрэ үс туур хаалла. Ыччаттарбытыгар бу эппиэттээх күннэргэ кыайыыны-хотууну баҕарабыт.

Степан АНДРЕЕВ.

Майа с.  

Добавить комментарий

Ваш адрес email не будет опубликован. Обязательные поля помечены *

137694
Бүгүн : 158