Сонуннар

Хаҥалас улууһун федерацията бастыҥынан ааттанна

Саха Республикатын дуобакка федерациятын 2023 сыл түмүктэрин таһаарар үөрүүлээх тэрээһинигэр «Бастыҥ үлэлээх федерация» диэн номинациятын кыайыылааҕынан Р.Д. Кононов салайааччылаах Хаҥалас улууһун спорт интеллектуальнай көрүҥнэригэр федерацията буолла.

Манан сибээстээн Покровскайтан сылдьар, 70 саастаах Родион Дмитриевич Кононовы бу ситиһиитинэн эҕэрдэлээн туран, кылгастык үлэтин туһунан билиһиннэрэригэр көрдөстүбүт.

-Улууска дуобат федерациятын биһиги салайбыппыт ыраатта, арааһа отучча сыл буолла быһыылаах. Мин бастаан саахымат федерациятын салайбытым. Онтон саахыматы, дуобаты холбоон интеллектуальнай оонньуулар федерацияларын тэрийбиппит. Тренердэрбитин барытын сөпкө аттаран тэрийэн үлэлэтэбит дии саныыбын. Ол курдук, биир маастарга кандидат уол тренердээхпит. Мохсоҕоллооххо эмиэ тренердээхпит, оҕолору таһаартаан эрэр.

Александр Соломонов уонна Владимир Иванов иккиэн олох үчүгэйдик үлэлииллэрин бэлиэтиибин. Инньэ гынан, тренердэрбит күүстээх спортсмен оҕолору иитэн таһааран, сотору-сотору күрэхтэһиилэргэ кытталлар. Уонна үөрүүөхпүт иһин, куруук ситиһиилээх, мэтээллээх кэлэллэр. Онон тренердэрбит маладьыастаатылар. Астынабын. Холобур, оскуола оҕото Айсен Егоров саахымакка хаһыс да сылын бастыҥнар кэккэлэригэр сылдьар. Соторутааҕыта киниэхэ спорт маастарын нуорматын иҥэрбиттэрэ. Ити курдук, маастарга кандидаттар үүнэн таҕыстылар. Кыргыттар эҥин. Онон дуобакка сайдыы баран эрэр диибин.

Күүстээх дуобатчыттары, гроссмейстердары ыҥыран Покорвскайга республика чемпионатын үһүс төгүлүн ыытабыт. Билигин Саха сирин оҕолорго күрэхтэһиитэ ыытылла турар дии. Онно биһиги улууспутуттан 37 оҕо кыттар. Бу да көрдөрүү итэҕэтэр дии саныыбын, Хаҥаласка интеллектуальнай оонньуу ханнык таһымҥа турарын.

Биһиги федерациябыт маннык улахан ааты-суолу, наҕарааданы аан бастаан ылла. Бу биһиэхэ улахан эппиэтинэһи сүктэрэр. Федерация салалтатыгар солбуйааччым Яковлев Юрий Дмитриевич. Биһиги бэйэбитигэр субуота аайы садуоба оонньуубут. Онно өссө куораттан, Мэҥэттэн, Намтан тиийэ кэлэн кытталлар. Спорт саалатыгар анаан биир хоһу ылбыппыт. Онон элбэх оҕо мустан дуобат, саахымат оонньуур усулуобуйата баар, – диэн астынан кэпсиир Родион Дмитриевич.

Манна даҕатан эттэххэ, «Сыл бастыҥ спортивнай оскуолата» диэн номинацияҕа Дьокуускай куорат 5 №-дээх оҕо спортивнай оскуолата (дириэктэр В.Н. Кычкин) буолла.

Петр ПАВЛОВ.

Ааптар хаартыскаҕа түһэриитэ.

Добавить комментарий

Ваш адрес email не будет опубликован. Обязательные поля помечены *

186560
Бүгүн : 264