Сонуннар

Чемпионат үрдүк тэрээһиннээхтик ыытылларыгар эрэнэбит

Билэргит курдук, тохсунньу 4-6 күннэригэр Уус Алдан улууһун киинигэр Бороҕоҥҥо, Н.Н. Тарскай кэриэһигэр көҥүл тустууга Саха Республикатын биирдиилээн уонна хамаанданан бастыыр иһин чемпионата ыытыллар.

Манан сибээстээн биһиги, Саха сирин физическэй култуураҕа уонна маассабай спорка управлениетын начаалынньыга Роман Иванович Оконешниковтан бэлэмнэнии хаамыытын ыйыталастыбыт.

-Чемпионаты бэлэмнээн, тэрийэн ыытыыга республикаҕа уонна улууска анал хамыыһыйалар үлэлииллэр, – диир Роман Иванович. – Аҕыйах хонуктааҕыта биһиги Бороҕоҥҥо тиийэн күрэхтэһии ыытыллар сирин көрдүбүт-иһиттибит. Итиэннэ миэстэҕэ сөптөөх үлэ ыытыллан, бэлэмнэнии бара турарын бэлиэтээтибит. Ол курдук, көрөөччүлэр олорон көрөр, хамаандалар түһэр-аһыыр сирдэрин, чемпионаты үөрүүлээхтик аһыы-сабыы сиэрдэрин-туомнарын, сааланы киэргэтиигэ тиийэ боппуруостары быһаарыстыбыт.

Биһиги, саҥа үүммүт 2024 сылга спорт көрүҥнэринэн барыта 68 чемпионаты бэлэмнээн, тэрийэн ыытыахтаахпыт. Онуоха Н.Н. Тарскай кэриэһигэр көҥүл тустууга Саха Республикатын хамаанданан уонна биирдиилээн бастыыр иһин чемпионата сылы саҕалыыр. Балаһыанньа быһыытынан, биһиги ыйааһыннарынан чемпионнарга – грамоталары, мэтээллэри уонна чулуу хамаандаларга кубоктары оҥотторон туттарабыт.

Үөрүүлээҕэ диэн, ыйааһыннарынан кыайыылаахтарга уонна үс бастыҥ көрдөрүүлээх хамаандаҕа – чемпионаты бэлэмнээн уонна тэрийэн ыытар улуус харчынан бириис олохтоото. Ол курдук, бастаабыт бөҕөстөр – 50, иккистээбиттэр – 30, үһүс буолбуттар – 20 тыһ. солк харчынан наҕараадаланыахтара. Онтон кыайыылаах хамаандалар туһааннааҕынан – 300, 200, 100 тыһ. солк. харчынан бэлиэтэниэхтэрэ. Итини тэҥэ үһүс сылын субуруччу, сахалартан уолаттарга ССРС бастакы чемпиона Вячеслав Карпов аатынан анал бириис – 65 киилэҕэ бастаабыт бөҕөскө, кини дьиэ кэргэнэ туруорар.

Биллэрин курдук, бу чемпионат Саха сиригэр физическэй култуура уонна спорт төлөннөөх салайааччыта Николай Николаевич Тарскай төрөөбүтэ 100 сылыгар ананан ыытыллар. Онон саҥа үүммүт сылы кини бирииһигэр ыытыллар улахан таһымнаах күрэхтэһиинэн саҕалыыбыт. Чемпионат түмүгүнэн көҥүл тустууга Саха сирин сүүмэрдэммит хамаандатыгар чилиэннэри талыы буолуоҕа. Итиэннэ тохсунньу бүтүүтэ Красноярскайга ыытыллар Иван Ярыгин Кубогар норуоттар икки ардыларынааҕы турнирга бэлэмнэнии курдук сыаналанар. Онон Бороҕон көбүөрүгэр күүстээхтэр бары кытталлар.

Саҥа дьыл иннинээҕи туругунан, чемпионакка кытталларын 23 хамаанда биллэрэн, сайаапка киллэрдэ. Ол быһыытынан, Мэҥэ Хаҥалас, Чурапчы, Сунтаар, Уус Алдан, Дьокуускай, Амма, Үөһээ Бүлүү хамаандалара толору састаабынан кыттыахтара.

Чемпионат кылаабынай судьуйатынан Россия спортивнай тустууга федерациятын эппиэттээх үлэһитэ, норуоттар икки ардыларынааҕы категориялаах судьуйа Николай Николаев, онтон кылаабынай секретарынан Бүтүн Россиятааҕы категориялаах судьуйа Василий Уйгуров үлэлиэхтэрэ.

Чемпионат үрдүк тэрээһиннээхтик ыытылларыгар эрэнэбит.

Петр Павлов.

   

Добавить комментарий

Ваш адрес email не будет опубликован. Обязательные поля помечены *

136676
Бүгүн : 185