Сонуннар

Билиҥҥи кэм геройун аатын үйэтитии

Г.И. Чиряев аатынан Бүлүү 1-кы нүөмэрдээх оскуолатыгар улуус оскуолаларын иһинэн баскетболга күрэхтэһии буолла. Бу күрэхтэһиигэ оскуолабыт 2021 с. выпускнигар, баскетболга Бүлүү улууһун хас да төгүллээх чемпионугар, өрөспүүбүлүкэ призеругар, анал байыаннай дьайыы кыттыылааҕар Винокуров Дмитрий сырдык кэриэһигэр ананна.

Билиҥҥи кэм геройа Дмитрий оскуолаҕа үөрэнэ сылдьан баскетболунан утумнаахтык дьарыктаммыта. Оскуола, улуус чиэһин  өрөспүүбүлүкэҕэ элбэхтик көмүскээбитэ. Дима «Бастыҥ оонньооччу», «Бастыҥ нападающий» диэн анал ааттар кыайыылааҕа этэ.

Кини 2023 сыл бэс ыйын 4 күнүгэр анал байыаннай дьайыыга кытта сылдьан тэҥэ суох киирсиигэ Запорожскай уобаласка сырдык тыына быстыбыта. Россия Федерациятын Президенин дьаһалынан “Эр санааланыы” уордьанынан наҕараадаламмыта.

Бу улахан тэрээһин чуумпуран туран Дмитрийы кэриэстээһинтэн саҕаланна. Оскуолабыт Е.В. Хрунов аатынан аэрокосмическай 11 “а” кылаас Мусин Амир хамандыырдаах, байыаннай патриотическай күрэхтэһиилэр кыайыылахтара кэккэлии хаамыыны көрдөрдүлэр. Диманы чиэстээн тэриллибит баскетбол күрэхтэһиитэ 9 оскуолаттан 16 хамаанда тэринэн күрэхтэһэ кэллилэр. Баппаҕаайы, Кыргыдай, Дьөккөн, Хампа, Халбаакы, Бүлүүтээҕи гимназия, 1, 2, 3 нүөмэрдээх оскуолалар. Күрэхтэһии кылаабынай судьуйатынан Кононов Д.Л. уола үлэлээтэ.

Баскетбол күрэҕин ыалдьыттара: улуус баһылыгын солбуйааччы А.А. Прокопьев, Бүлүү куоратын баһылыга Я.А. Попов, Росгвардия Бүлүүтээҕи начальнига А.Н. Константинов, Дима ийэтэ В.В. Винокурова, кылаас салайааччыта М.И. Федорова тыл эттилэр. Бу олус суолталаах күрэхтэһии буоларын спортсмен оҕолор бары бэлиэтииллэр, кыайыылаах буолуу – улахан чиэс. Кыахтаах утарылаһааччылар мустаннар, Дмитрий сырдык кэриэһигэр бэйэлэрин убаастабылларын биллэрэн күөн көрүстүлэр.

Күрэхтэһии олус тыҥааһыннаахтык барда. Икки күн күүрээннээх киирсии түмүгүнэн кыайыылаахтарынан буоллулар: 1 миэстэни – Бүлүүтээҕи гимназия, 2 миэстэ – Г.И. Чиряев аатынан 1 №-дээх оскуола, 3 миэстэ – Г.С. Донской аатынан 2 №-ээх оскуолатын спортсменнара ыллылар.

Бу кыайбыт хамаандаларга Дима төрөппүттэрэ уонна аймахтара “IRON” маҕаһыынтан 30000, 25000, 20000 суумалаах сертификаттары туттардылар. Чаҕылхай оонньооччуларга анал аатттар тутттарылыннылар: “Бастыҥ оонньоочу” анал аат Тутукарова Сайаана, Протопопов Денис (гимназия), “Бастыҥ нападающай” – Гоголева Надя (2-с оскуола), Петров Ганя (1-кы оскуола), «Бастыҥ защитник” – Яковлева Рада (Илбэҥэ), Чирков Витя (Хампа), “ Инникилээх оонньооччу” – Александрова Эвелина (Кыргыдай), Васильев Андриан (3-с оскуола) туттарылынна. Маны таһынан эбии күрэхтэһиилэргэ хоппуттар: “Штрафной бросок” – Данилова Мичийээнэ (Илбэҥэ),” Трехочковые броски” – Григорьев Камиль (1-кы оскуола). Кыайыылаахтар бары сыаналаах бэлэхтэри тутан үөрэн-көтөн тарҕастылар.

Бу тэрээһин сүрүн спонсордарыгар уонна партнердарыгар – Дима төрөппүттэригэр, аймахтарыгар, Бүлүү улууһун дьаһалтатыгар, Бүлүүтээҕи педагогическай профессиональнай колледжка (дир. Алексеев И.И.), Ис дьыала отделыгар (Михайлов Ф.П.), Бүлүү улууһун бойобуой кыргыһыылар ветераннарын сэбиэтигэр, Бүлүүтээҕи Росгвардия коллективыгар (Константиноа А.Н.), Бүлүү уонна Үөһээ Бүлүү байыаннай комиссариатыгар (Харлампьев С.Н), Үгүлээт нэһилиэгин дьаһалтатыгар (Лукин О.И.), Бүлүү куоратын уонна улууһун спорткомитеттарыгар, «Байдам» торговай центрыгар (Буслаев Т.А., Буслаева К.Х.), «Табун» торговай центрыгар (Иванов И. И.), ИП Николаев Ф. Н., ИП Майорова В.Д., СХПК «Сыа Бүлүү» (Кондратьев А.А.), оскуолабыт төрөппүттэрин кэмитиэтигэр, 11«а», 11«б», 11 «в»  2021с. выпуск кылаастарын төрөпүттэригэр, үөрэнээччилэригэр,  Дима бииргэ оонньообут хамаандатыгар, Н. В., А. С.Поповтар дьиэ кэргэнигэр, Дима тренеригэр Гоголев Д.Д., 1-кы оскуола коллективыгар (дир. Степанова В.С.) – бука барыларыгар улахан махталбытын тириэрдэбит.

Хорсун буойун, эн үтүө ааккын дьаныардаах үлэҕэ, үөрэххэ, күрэххэ бар дьонуҥ, оҕолор, ыччаттар киэн тутта, холобур оҥосто ааттыахпыт. Эйэлээх олох туһугар сырдык тыынын толук уурбут хорсун буойуммут Дима Винокуров аата мэлдьи биһиги сүрэхпитигэр хаалыаҕа.

Уйгулаана ПРОКОПЬЕВА, Г.И. Чиряев аатынан Бүлүү 1 №-ээх оскуолатын үөрэнээччитэ.

Добавить комментарий

Ваш адрес email не будет опубликован. Обязательные поля помечены *

137694
Бүгүн : 158