Сонуннар

Анатолий Софронов саҥа кинигэтэ

“Дьулурҕан” хаһыат көхтөөх көмөлөһөөччүтэ, элбэх суруйуулар ааптардара Анатолий Софронов “Нам улууһун спордун сулустара” диэн саҥа кинигэтэ таҕыста.

Бу, Саха сиригэр физическэй култуура хамсааһына саҕаламмыта 100 сылыгар ананан тахсыбыт кинигэ Нам улууһун бастыҥ спортсменнарын туһунан кэпсиир, кинилэр спорка ситиһиилэрин сырдатар. Таһаарыыны ыйынньык-кинигэ диэххэ сөп. Манна улуус бастакы чемпионнара, Саха сирин кыайыылаахтара, маҥнайгы маастардар, рекордсменнар, Россия уонна аан дойдутааҕы таһымнаах күрэхтэһиилэргэ ситиһиилээх спортсменнар хас биирдиилэрэ сэбэрэлэрэ көстүүлээх киирбиттэр.

Кырдьык, Нам улууһа саха спордугар элбэх спорт сулуһун биэрбитэ. Ол курдук, сахаттан тустууга РСФСР бастакы чемпиона Николай Гоголев, боксаҕа республика тоҕус төгүллээх чемпиона, спорт маастара Василий Васильев, сахаттан дуобакка бастакы гроссмейстер Александр Азаров, көҥүл тустууга ССРС чемпионатын призера Иннокентий Зырянов, Дыгын оонньуутун алта төгүллээх муҥутуур кыайыылааҕа Николай Дьяконов, гректи-римнии тустууга Россия чемпиона Дмитрий Ушницкай, көҥүл тустууга Россия икки төгүллээх чемпиона, аан дойду чемпионатын призера, спорт үтүөлээх маастара Петр Юмшанов, ат спордугар сахалартан бастакынан “мастер жокей” аатын ылбыт Сергей Ядреев, мас-реслиҥҥэ Россия хамаандатын сүрүн тренерэ Николай Константинов, оҕунан ытыыга Россия чемпиона Эрилик Күндайаана, көҥүл тустууга аҕам саастаахтарга аан дойду чемпионатын призера Александр Румин уо.д.а. бары Эҥсиэли хочотуттан төрүттээхтэр.

Дьэ, кинилэр уонна да атыттар, барыта сүүсчэкэ киһи бу кинигэҕэ сиһилии суруллубуттар. Эппиппит курдук, кинигэ ыйынньык-таһаарыы буоларынан, Нам бастыҥ спортсменнарын, кинилэр ситиһиилэрин туһунан тугу эмэ билиэххин баҕарар буоллаххына, бу кинигэни ылан ааҕан билиэххин сөп. Быһата бэртээхэй таһаарыы, халыҥ тастаах, элбэх хаартыскалаах, үгүс сыыппаралардаах-чахчылардаах.

Ааптар Анатолий Михайлович Софронов туһунан билиһиннэрдэххэ, кини – спорт бэтэрээнэ, Саха Республикатын физическэй култууратын уонна спордун туйгуна, Нам улууһуттан аҕам саастаахтарга бастакынан СахаВА бочуоттаах маастара. I Хомустаах нэһилиэгин бочуоттаах гражданина. “Онтуон” диэн аатынан биллэр хомоҕой тыллаах хоһоонньут. Россия суруналыыстарын, Саха сирин суруйааччыларын сойуустарын чилиэнэ, спорт туһунан үс кинигэ ааптара.

Спорду ахсаабакка сырдатар Анатолий Михайловиһы саҥа кинигэтэ күн сирин көрбүтүнэн эҕэрдэлиибит! Кытаанах доруобуйаны, айар үлэтигэр өссө ситиһиилэри баҕарабыт.

“Дьулурҕан”.

Добавить комментарий

Ваш адрес email не будет опубликован. Обязательные поля помечены *

137694
Бүгүн : 158