Сонуннар

15 сыл буолан баран чемпион үрдүк аатын ыллылар

Тохсунньу 27-28 күннэригэр Горнай Бэрдьигэстээҕэр комплекснай спартакиада иккис көрүҥэ – волейбол күрэхтэһиитэ буолла. Манна нэһилиэктэр бары кэлэн кыттыбыттара, спорт маассабай көрүҥэ киэҥник биһирэнэрин көрдөрөр.

Биһиги улууска 2021 с. ыытыллыбыт Манчаары оонньууларын көрсө тутуллубут киэҥ-куоҥ спортивнай комплекска уонна Бэрдьигэстээххэ Олимпийскай эрэллэри бэлэмниир өрөспүүбүлүкэтээҕи оҕо спортивнай оскуолатын саалатыгар хамаандалар арахсан оонньообуттара олус табыгастаах буолла. Тэрийээччилэр волейболу көҕүлүүр туһуттан, быйылгы финалы үс кыайыыга диэри оҥорбуттарын, спортсменнар эрэ буолбакка, көрөөччүлэр кытары олус сэҥээрдилэр.

Күрэхтэһэ кэлбит хамаандалартан Атамай, Маалтааны, Одуну, Маҥаны нэһилиэктэрэ бастакы оонньууларыттан, үс бастыҥ иһигэр киирэргэ сорунан кэлбиттэрэ көһүннэ. Мытаах, Октябрьскай, Кировскай уолаттара, кыргыттара ити үөһээ ааттаммыт хамаандаларга күүстээх утарсыыны оҥорон соһуттулар. Кэскиллээх ыччаттар тахсан эрэллэр эбит. Салгыы дьарыктаннахтарына, бастыҥнар кэккэлэригэр киирэр кыахтаахтар диэн бэлиэтиэх тустаахпыт. Күрэхтэһиигэ биир дьиэ кэргэнтэн хас хамаанда ахсын эдьиийдии-балыс, убайдыы-быраат, Кэптинтэн Алексеевтар аймахтан үс киһи кэлэн, нэһилиэктэрин туһугар кыттыбыттарын киһи астына көрөр.

Икки күннээх сытыы киирсиилэр кэннилэриттэн үс бастыҥ иһигэр кыргыттарга Бэрдьигэстээх, Атамай, Одуну киирдилэр. Эр дьоҥҥо пьедестал үктэллэригэр Маалтааны, Маҥаны, Атамай тахсар чиэстэннилэр.

Күрэхтэһии бастыҥ оонньооччуларынан «Защитник» – Каролина Петрова (Одуну), Иван Аржаков (Маҥаны), «Нападающай» – Элла Алексеева (Атамай), Игорь Чемезов (Маҥаны), «Игрок» – Туяра Никифорова (Бэрдьигэстээх), Виктор Лукин (Маалтааны), «Связующий» – Александра Оленова (Бэрдьигэстээх), Олег Николаев (Маалтааны) ааттаннылар.

Вячеслав Алексеев. Горнай.

Ааптар хаартыскаҕа түһэриитэ. 

Добавить комментарий

Ваш адрес email не будет опубликован. Обязательные поля помечены *

137678
Бүгүн : 142