История

Кинигэҕэ киирбит хаартыска туһунан

Тустуу улахан сүгүрүйээччитэ Владимир Петров “Сахаачча сырдык сулуһа” (2008) диэн кинигэтигэр убайым Николай Захаров – Сахаачча биир кыра оҕону көтөҕөн түспүт хаартыската баар. Ол хаартыска ис хоһоонун туһунан кэлин сиһилии билэммин, кэпсииргэ соруннум.

Урукку сылларга сорох дьон ити оҕону, убайым Николай оҕотун курдук саныыллара…

Онтон ыла номнуо 56 сыл ааспыт. Быйыл саас кулун тутарга, Болугур олохтооҕо, спорду сэҥээрээччи Устинов Петр Евсеевич ити хаартыска туһунан сиһилии кэпсээтэ.

Хаартыскаҕа көтөхтөрөн олорор оҕо Амма Наахара-Өнньүөс бөһүөлэгэр олорбут Анна Егоровна уонна Егор Михайлович Никифоровтар бастакы оҕолоро Ньургун эбит.

Ити 1967 сыллаахха убайым Николай Польшаҕа, Кошалин куоракка буолбут «Олимпийскай эрэллэр» диэн көҥүл тустууга эдэрдэр күрэхтэһиилэригэр бастакы миэстэни ылан, кыһыл көмүс мэтээлинэн уонна үчүгэй техникатын иһин Хурустаал кубогынан наҕараадаламмыта.

Ол кэнниттэн дойдутугар кэлэн, үгүс элбэх көрсүһүүлэр буолбуттара. Онно биирдэстэригэр спорткомитет председателэ Никитин Николай Николаевичтыын Амма Наахара-Өнньүөс бөһүөлэгэр көрсүһүү кэнниттэн Никифоровтар диэн эдэр ыалга сылдьан баран, хаартыскаҕа түһүү буолбут. Онно убайым Николай – Никифоровтар бастакы оҕолорун Ньургуну көтөҕөн хаартыскаҕа түспүт.

Кыра киһи мэтээли тииһинэн боруобалаан, алгыс ылан, улаатан баран спортивнай оскуолаҕа үөрэнэн, тустуу секциятыгар дьарыктанан, ситиһиилэрдээх буолбут, – диэн Никифоровтар аймахтара Петр Устинов кэпсээтэ.

Ити хаартыска ис хоһоонун дьэ билэн, олус үөрэн, хаартысканы үйэтиппит Никифоровтар дьиэ кэргэҥҥэ улаханнык махтанабын!

Анна Семеновна Захарова-Новгородова, Сахаачча балта. 

 

Добавить комментарий

Ваш адрес email не будет опубликован. Обязательные поля помечены *

137674
Бүгүн : 138