Сонуннар

Сүдү өйдөбүллээх ураты тэрээһиҥҥэ

Спорт эйгэтигэр сылы түмүктүүр, бастыҥнары чиэстиир «Чемпионнар Баллара» ньиргийэн ааста. Киһи сүргэтин көтөҕөрдүү киэргэтиллибит, симэммит «Өрөгөй» Спорка бэлэмнэнии киинигэр хаһан баҕарар буоларыныы, дьон бөҕө тоҕуоруста.

Быйылгы тэрээһин сүдү уратылаах. Ол эбэтэр, Саха сиригэр физическэй культура төрүттэммитэ 100 сылыгар ананан уонна спорт, физкультура үлэһиттэрин 3-с съезтэрин чэрчитинэн ыытылынна. Бу иннинэ улуустартан, куораттартан талыллан кэлбит делегаттар, съезд араас дьаһалларыгар, тэрээһиннэригэр көхтөөхтүк кытыннылар. Бэлиэ түгэн буоларын быһыытынан, саха спорда салгыы сайдарын туһугар уруккуну-хойуккуну санаһыы-ахтыһыы, инники соруктары туруоруу, ырытыһыы буолла.

Саалаҕа инники бочуоттаах миэстэҕэ уруккуну санатан, түөстэригэр аалай лиэнтэлээх аҕам саастаах спорт бэтэрээннэр сэргэх сэбэрэлэрин көрөн киһи санаата көтөҕүллэр.

Историяҕа киирэр улахан тэрээһини аһар тыл Саха Республикатын Правительствотын председателэ Кирилл Бычковка бэрилиннэ. Кини бары спортсменнары, тренердэри, спорт бэтэрээннэрин 100 сыллаах үбүлүөйүнэн эҕэрдэлээн туран, бастыҥнарга государственнай наҕараадалары туттарда. Ол курдук, республикатааҕы адаптивнай спорт киинин тренерэ Василий Оленовка – «Саха сирин үтүөлээх тренерэ», СР Спорка бэлэмнэнии киинин отделын начальнига Матвей Лыткиҥҥа – «физическэй культура уонна спорт үтүөлээх үлэһитэ» ааттар иҥэриллэн үөрүүлээх быһыыга-майгыга туттарылыннылар, Ити курдук, Олимпийскай эрэл училищетын тренерэ Павел Капитонов – СР Правительствотын грамотатынан наҕараадаланна.

Салгыы, киин сыанаҕа Саха сирин физическэй культураҕа уонна спорка министрэ Леонид Спиридонов тахсар. Кини, республика салалтата спорт сайдыытыгар көмөтүн иһин махтанна итиэннэ эһиил ыытыллар «Азия оҕолоро» норуоттар икки ардыларынааҕы VIII спортивнай оонньуулары хаһааҥҥытааҕар даҕаны үрдүк таһымнаахтык бэлэмнээн, тэрийэн ыытарга ыҥырда.

Бу киэһэ, сүүс сыллаах өрөгөйдөөх үбүлүөйү үөруулээхтик бэлиэтээһин буоларын быһыытынан, бастыҥнарга-чулууларга элбэх наҕараадалар туттарылыннылар.

Саха сирин спордун өр сылларга ситиһиилээхтик салайан үлэлээбит, бэйэтин кэмигэр биллиилээх спортсмен Афанасий Егорович Алексеев – республика аҕам саастаах спортсменнарын ааттарыттан, саха спордун өрүү өрө тута сылдьарга көҕүлээн-ыҥыран, эстафета кубогын эдэр спортсмен уолга, В.П. Керемясов аатынан Дьокуускай куорат 3 №-дээх спортивнай оскуолатын иитиллээччитэ, көҥүл тустууга Дальнай Восток федеральнай уокуругун кыайыылааҕа Ариан Винокуровка туттарыыта уратытык, бэлиэтик көһүннэ.

Дьэ, ити кэнниттэн 2023 сыл бастыҥ спортсменнарын, тренердэрин чиэстээһин саҕаланна. Ол туһунан аныгыскы суруйууга…

Түмүктээн эттэххэ, Саха сирин спорка уонна физкультураҕа үлэһиттэрэ, тренердэрэ бу тэрээһиннэргэ сылдьан элбэҕи биллилэр-көрдүлэр, бэйэлэрин үлэлэрин өссө тупсарарга баҕа санаалаах, кэскиллээх былааннардаах тарҕастылар диэн эрэниэххэ сөп. Онтон спортсменнар, чиэстэммит-бочуоттамыт дьон буолалларынан санаалара көтөҕүллэн, быйылгы ситиһиилэрин өссө куоһарарга дьулуһалларыгар баҕарабыт!

Петр ПАВЛОВ.

Ааптар хаартыскаҕа уонна видеоҕа түһэриилэрэ.  

Добавить комментарий

Ваш адрес email не будет опубликован. Обязательные поля помечены *

137668
Бүгүн : 132