Сонуннар

Оҕо спордуттан – Олимпиада чыпчаалыгар

Быйыл Бэрдьигэстээххэ Олимпийскай эрэллэри бэлэмниир өрөспүүбүлүкэтээҕи оҕо спортивнай оскуолата тэриллибитэ 10 сыла. Бу бэлиэ түгэнинэн туһанан бүгүн спортивнай оскуола кэлэктиибэ “От детского спорта – Олимпийским вершинам” диэн кинигэни бэчээттэтэн таһаарбытын сүрэхтэниитэ буолла.

Спортивнай оскуола 10 сыл устата улууспут эрэ буолбакка, өрөспүүбүлүкэ спорда сайдарыгар үгүс элбэх ситиһиилэрдээх. Кинигэҕэ ити сыллар устата туох үлэ ыытыллыбытын, спортсменнар көрдөрүүлэрэ киирэр.

Үөрүүллээх тэрээһин кэмигэр мустубут дьон биһиги киэн туттар спортсменнарбыт Николай Лукин, убайдыы-быраат Герман, Александр Контоевтар, эдиийдии-балыс Кристина Устинова (Тимофеева), Розалина Тимофеева Аан дойду, Европа, Россия түһүлгэлэригэр чаҕылхай ситиһиилэрин ахтан-санаан, барҕа махтал тыллар ананнылар.

Улуус баһылыгын бастакы солбуйааччыта Сардаана Стручкова Бэрдьигэстээххэ Олимпийскай эрэллэри бэлэмниир өрөспүүбүлүкэтээҕи оҕо спортивнай оскуолатын дириэктэригэр Осип Михайловка, Роман Пахомовка Махтал суруктары, үөрэх үөрэх управлениетын начаалынньыга Варвара Сметанина эҕэрдэлээн туран, “Горнай улууһун үөрэҕириитигэр кылаатын иһин” анал бэлиэни тренер Николай Егоровка туттардылар. Спорт сайдарыгар ситиһиилээх үлэни баҕардылар.

Спортивнай оскуола аатыттан Роман Пахомов спортивнай оскуола үлэтэ суруллан, тиһиллэн улуус историятыгар хааларыгар “Үлэ күүһэ” хаһыат бэчээттээччитигэр Мая Михайловаҕа, ох спордун федерациятын бэрэссэдээтэлигэр Анатолий Лю-фаҕа, бары спонсордарга махталын биилэрдэ.

Кинигэни уон сыл устата дириэктэрдээбит Роман Пахомов, спортивнай оскуола үлэһиттэрэ Вера Колесова, Мая Копылова, Сардаана Ю бэчээккэ бэлэмнээн, “Үлэ күүһэ” хаһыат редакциятыгар таҥыллан, күн сирин көрдө.

Вячеслав АЛЕКСЕЕВ.

Горнай.

Добавить комментарий

Ваш адрес email не будет опубликован. Обязательные поля помечены *

137681
Бүгүн : 145