Сонуннар

Курбуһах тустууга филиалын үйэ аҥардаах үбүлүөйүгэр…

Ахсынньы 2 күнүгэр нэһилиэкпитигэр, Курбуһахха тустуу филиала аһыллан үлэлээбитэ 50 сылыгар аналлаах үбүлүөйдээх дьаһал бэрт тэрээһиннээхтик барда. Бэлиэ түгэнинэн, филиал бастакы тренерэ, көҥүл тустууга ССРС спордун маастара Наум Егорович Ермолаев кэриэһигэр оҕолорго республикатааҕы турнир тэрилиннэ. Уопсайа Уус Алдантан, Мэҥэ Хаҥаластан, Чурапчыттан, Дьокуускайтан 13 хамаанда, 76 эдэр бөҕөс кэллэ.

Бочуоттаах ыалдьыттар: Окоемов Семен Сергеевич, ССРС спордун маастара, аан дойдутааҕы категориялаах судьуйа, Пестряков Алексей Николаевич, ХИФУ преподавателэ, спорт бэтэрээнэ, Аммосов Василий Васильевич, спорт бэтэрээнэ, Бурнашев Иван Афанасьевич, спорт бэтэрээнэ уонна Курбуһахтан төрүттээх ытыктанар дьоммут, республика улахан күрэхтэһиилэрин салайан ыытар комментатор, спорт бэтэрээнэ Александр Ушницкай кэлэн үлэлээтилэр, күрэхтэһии үрдүк тэрээһиннээхтик, сыыһата-халтыта суох кудуччу барарыгар күүс-көмө буоллулар.

Бороҕонтон улууспут баһылыгын бастакы солбуйааччыта Артамонов Илья Юрьевич, спорт управлениетын саҥа салайааччыта Алексеев Евгений Петрович, ДЮСШ саҥа анаммыт дириэктэрэ Слепцов Михаил Андреевич, Бороҕоннооҕу спорткомплекс дириэктэрэ Давыдов Константин Васильевич кэлэннэр тэрээһини киэргэттилэр. Өтөрүнэн буолбатах оҕолор күрэхтэһиилэрин көрөөрү дьон-сэргэ да муста сатаата.

Нэһилиэктэн көҥүл тустууга бастакы спорт маастара, Курбуһахтааҕы филиалы төрүттээбит, киэн туттар спортсмеммыт Наум Егорович Ермолаев туһунан бэртээхэй кинигэ сүрэхтэннэ. Залга, оскуолаҕа буфеттар удамыр сыанаҕа тиһигин быспакка үлэлээтилэр. Күрэхтэһиини үөрүүлээхтик аһыы, наҕараадалааһын сиэрдэрэ-туомнара, кулуубу киэргэтии үлэлэрэ педколлектив күүһүнэн бэркэ тэрилиннилэр. Администрация, спонсордар күүстэринэн мэтээллэр, бириистэр элбэхтэрэ барыбытын сөхтөрдө да, астыннарда даҕаны.

Көбүөргэ 2009-2011, 2012-2015, 2015-2016 сс. төрөөбүт оҕолор күөн көрүстүлэр. Тустуу түмүгүнэн бэйэлэрин ыйааһыннарыгар бастаатылар: 24 кг – Ганя Марков (Мэҥэ Хаҥалас), 32 кг – Саян Моякунов, 35 кг – Эрчимэн Сивцев (иккиэн – Дьокуускай), Валера Иванов (Тумул), 38 кг – Андрей Макеев (Мындааба), 45 кг – Вася Смирников (Чурапчы), 54 кг – Айтал Аммосов (Сыырдаах) уонна кыргыттарга 45 кг – Юлиана Иванова (Курбуһах). Күрэхтэһии кылаабынай судьуйатынан норуоттар икки ардыларынааҕы кылаастаах спорт маастара Иван Пантилов үлэтээтэ. Онтон кылаабынай секретарынан – Наум Адамов (Чурапчы) үлэлээтэ.

Анал бириистэри ылбыт оҕолор 3-4 бириискэ тиксэн, үөрүөхтэрин үөрдүлэр! Уус Күөлүттэн 9 оҕо, Окоемовкаттан Дьулус Сыроватскай эмиэ 6 оҕону бэлэмнээн аҕалан, бириискэ тикситэлээтилэр. Күммүт-дьылбыт да туран биэрдэ. Онон кэлбит кыттааччылар да, олохтоохтор даҕаны сытыы киирсиилэри көрөн, оҕолор кыайыыга дьулуурдарын, кыайыыны-хотторууну ис сүрэхтэриттэн ылынан, астына күрэхтэспиттэрин көрөн үөрдүбүт, сэргэхсийдибит!

Филиал урукку тренердэрэ Николай Романович Крылов, Петр Петрович Черкашин куораттан күүстээх састааптаах хамаандалары аҕалан, бэйэлэрэ бириис туруоран, ыччаты иитиигэ билигин да туруулаһан үлэлии сылдьалларын көрдөрдүлэр. Кинилэри иккиэннэрин Курбуһах нэһилиэгин саамай үрдүк наҕараадатын, Бочуоттаах олохтоохтор ааттарын ылбыттарынан эҕэрдэлиибит! Ити курдук, өрн сылларга тренеринэн үлэлээбит Алексей Николаевич Окоемов эмиэ анал бэлиэнэн наҕараадаланна. Аймахтар ааттарыттан бастатан туран, бырааппыт, улуус депутата Наум Наумович Ермолаевка, кини дьиэ кэргэнигэр аҕаларын, эһэлэрин аатын өрө тутан үрдүк таһымҥа ааттаппыптарыгар махталбытын биллэрэбит!

Күрэхтэһии бириискэ фондата улахан, бириис бөҕө, харчынан бириистэр бэрилиннилэр. Спонсордар: Аммосов Владимир Дмитриевич, Копырин Евгений Михайлович, Аммосов Ариан Васильевич, Протопопов Иван Иванович, Ермолаев Семен Егорович, Давыдов Константин Васильевич, Окоемов Семен Сергеевич, Бурнашев Иван Афанасьевич, Гуляев Владислав Прокопьевич, Васильев Геннадий Анатольевич, Вера Афанасьевна Гоголева-Шепелева, КСШИ-89 выпускниктара, Саша Ермолаев кылааһынньыктара, Пестряков Семен Иннокентиевич, ООО Цикл, ООО Офсет, Курбуһах нэһилиэгэ, Уус Күөл, Окоемовка, Балаҕаннаах оскуолалара, детсадтара, Кырдьаҕастар дьиэлэрэ КДПИ, ЖКХ, МПЧ, ЦД Сандал, Балыыһа колектива, Библиотека. Генеральнай спонсор – ООО СК Дохсун (генеральнай дириэктэр Арсен Наумович Ермолаев). Кинилэргэ барыларыгар күүс-көмө, өйөбүл буолбуттарын иһин барҕа махтал!

Администрациябыт үлэһиттэрэ саха сиэринэн ыраахтан кэлбит ыалдьыттары, филиалларын умнубакка олоххо сирдьит суол оҥостубут спорт бэтэрээннэрин чиэстээн-бочуоттаан, баай талым остуолу тэрийэн, күндүлээн ыыппыттарыгар барҕа махталбытын биллэрэбит!

Бу бэртээхэй күрэхтэһиигэ кыттыбыт оҕолор спорка, чөл олоххо, доҕордуу-атастыы буоларга дьулуһуулара өссө күүһүрүө, өйдүү саныы сылдьыахтара диэн эрэнэбит!

Василий АММОСОВ, Уус Алдан улууһун, Курбуһах нэһилиэгин бочуоттаах олохтооҕо, “Гражданскай килбиэн” бэлиэ хаһаайына. 

Уус Алдан, Курбуһах.

Добавить комментарий

Ваш адрес email не будет опубликован. Обязательные поля помечены *

199034
Бүгүн : 325