Сонуннар

«Кэскил» уһуйааммыт ыалдьыта – Гроссмейстер

Дүпсүннээҕи «Кэскил» уһуйаан үрдүк категориялаах иитээччитэ РФ үөрэҕириитин бочуоттаах үлэһитэ Любовь Николаевна Прибылых ыҥырыытынан биир дойдулаахпыт, биллиилээх тренер, гроссмейстер Петр Петрович Ушницкай ыалдьыттаан барда.

Оҕолор убаастыыр биир дойдулаахпытын, аатырбыт тренери, дуобаты олоҕун аргыһа оҥостубут Петр Ушницкайы үөрэ-көтө өрө көтөҕүллэн көрүстүлэр. Бастаан утаа уруккуттан билэр киһилэринии истиҥник сэһэргэстилэр, ыйытар боппуруостарыгар хоруйдаатылар. Сорохтор киниттэн бэйэтиттэн эмиэ ыйыталаһар дьон буолан соһуттулар. Онтон дьэ хайдах оҕолор оонньуулларын билсиһэрдии маастар-кылааһы саҕалаата. Уонна бу 5-6 саастаах оҕолор дуобаты сатаан оонньуулларыттан үөрдэ.

Оонньуу кэмигэр олус табыгастаахтык, кырачааннарга сөп түбэһэрдии быһааран үөрэтэн барда, дьиҥнээх педагог буоларын көрдөрдө. Кудрин Сандал, Игнатьева Тамира олус тапсан, өйдөһөн гроссмейстеры кытта оонньоотулар. Бу икки оҕону ордук сатыылларын бэлиэтии көрөн хайҕаата, кинилэри кытта хаартыскаҕа түһүүм диэн баҕатын эттэ.

Бу саха дьоно сөбүлүүр дуобаттарын уһуйаан саастарыттан интэриэһиргээн оҕолор оонньуулларыттан үөрдэ, астынна.

Аатырбыт дуобатчыт, биир дойдулаахпыт Ушницкай П.П.  дойдутун Дүпсүн сирин кэлэр кэскиллэригэр – “Кэскил” уһуйаан иитиллээччилэригэр, дуобат интеллектуальнай оонньууну көрдөрөн билиһиннэрбитигэр, маастар-кылаас ыыппытыгар, уһуйааммыт аатыттан истиҥ махталбытын тиэрдэбит, киниэхэ үлэтигэр үрдүк ситиһиилэри, чэгиэн доруобуйаны баҕарабыт!

Дүпсүннээҕи «Кэскил» уһуйаан сэбиэдиссэйэ Александра Молокотина.

Добавить комментарий

Ваш адрес email не будет опубликован. Обязательные поля помечены *

137671
Бүгүн : 135