Сонуннар

Буулдьанан ытыы спордун ааттаппыт үтүөкэннээх дьон

Горнайга буулдьанан ытыы көрүҥэ өрөспүүбүлүкэҕэ биир бастакынан тэриллибитэ. Төрүттээбит дьоннорунан РСФСР үөрэҕириитин туйгуна, СӨ физическэй култууратын үтүөлээх үлэһитэ Егор Матвеевич Сергееви, спорт бу көрүҥэр сахалартан бастакы ССРС спордун маастара, «XX үйэ спордун лауреата» Николай Николаевич Лукины киэн тутта ааттыыбыт.

Бэрдьигэстээххэ, «Бэргэн» спортивнай комплекска киэн туттар дьоммут сырдык ааттарын үйэтитэн, кинилэр олохторун-дьаһахтарын, үлэлэрин-хамнастарын кэпсиир, ситиһиилэрин көрдөрөр анал стендэ арыллынна. Бэрт үчүгэй оҥоһуулаах, киһи хараҕар хатанар стендэни үтүөкэннээх дьон иитиллээччилэрэ, спортивнай оскуола салалтата, спонсордар көҕүлээһиннэринэн баар буолла.

Үгэс быһыытынан аалай лиэнтэни Егор Матвеевич, Николай Николаевич кыргыттара Марианна Сергеева уонна Аэлита Лукина, Бэрдьигэстээххэ Олимпийскай эрэллэри бэлэмниир өрөспүүбүлүкэтээҕи оҕо спортивнай оскуола дириэктэрэ Осип Михайлов быһан, стендэни арыйдылар.

Буулдьанан ытыы көрүҥүн сайыннарбыт дьоммут иитиллээччилэрэ Николай Егоров, Вера Кесерева кылгас ахтыы оҥордулар. Улуус баһылыгын бастакы солбуйааччы Сардаана Стручкова, депутаттар Сэбиэттэрин бэрэссэдээтэлэ Маргарита Константинова мустубут дьону эҕэрдэлээн, үтүө, үлэһит дьон ааттарын салгыы үйэтитэ турарга ыҥырдылар.

Вячеслав Алексеев. Горнай.

Ааптар хаартыскаҕа түһэриилэрэ.

Добавить комментарий

Ваш адрес email не будет опубликован. Обязательные поля помечены *

137677
Бүгүн : 141