Сонуннар

Бэргэн ытааччылар күрэхтэстилэр

Ахсынньы 2 күнүгэр бэһис нүөмэрдээх оҕо спортивнай оскуолатын саалатыгар ытыы саха национальнай көрүҥэр Советскай Союз Геройа Федор Матвеевич Охлопков аатыгар Саха Республикатын чемпионата буолла. Уон биэс улуус 17 хамаандатыттан 90-ча ытааччы ким бэргэнин быһаарыста. Бу кэмҥэ суол-иис мөлтөһүөр буолан, кыттааччы арыый аҕыйах.

Ытыы бу көрүҥнэрин бэйэтэ өйүнэн-санаатынан айан, онтон кинилэри көмүскээн патент ылбыт киһинэн Гурьев Иван Маркович буолар. Иван Маркович сыратынан ытыы саха национальнай көрүҥнэрэ бигэргэтиллэн, билигин бу бу көрүҥнэргэ Саха Республикатын спордун маастара буолуохха сөп. Гурьев И.М. сахаҕа уһулуччу киһи – бэйэтин кэмигэр Чурапчытааҕы спортивнай оскуолаҕа Д.П. Коркиҥҥа дьарыктаммыта, онтон пограничник идэтин баһыйан пограничнай этэрээт хамандыыра буолан, дойдубут араас кэрдиилэрин манаан-көмүскээн кэлбитэ, хас да уоттаах сэрии кыттыылааҕа, сулууспатын кэннэ өр сылларга Саха Республикатын ытыыга Федерациятын толорооччу дириэктэринэн үлэлээбитэ, ити кэмҥэ бэһис нүөмэрдээх оҕо спортивнай оскуолатыгар тренердээбитэ, “Патриот” спортивнай кулуубу тэрийбитэ.

Чемпионат үөрүүлээх аһыллыытын кэмигэр, түгэнинэн туһанан Иван Маркович Гурьевы 70 сааһын туолбутунан итиитик-истиҥник эҕэрдэлээтибит, махтанныбыт! Саха национальнай спорт көрүҥнэрин республикатааҕы киинин дириэктэрин бастакы солбуйааччы И.И. Борисов, Дьокуускай куорат спорка управлениетын салайааччыта Э.В. Ефимов, бэһис нүөмэрдээх оҕо спортивнай оскуола дириэктэрэ В.Н. Кычкин эҕэрдэ-махтал тылларын этэн туран, чемпионат тэрийээччилэригэр, кыттааччыларыгар бэргэнник ытан, үрдүкү чыпчаалларга тиийэллэригэр баҕардылар. Нам улууһун спорка управлениетын аатыттан эҕэрдэни, бэлэҕи спорт маастара В.В. Сокольникова туттарда, Ытыы федерациятын аатыттан Саха сирин уонна Россия спордун маастара А.Д. Павлова эҕэрдэлээтэ, бэлэх туттарда. Бэйэтин кэс тылын Герой уола Роман Федорович Охлопков эттэ.

Бу чемпионат атын күрэхтэһиилэртэн уратыта диэн, көрүҥ аайы эр киһи дьахтар диэн арахсыбакка, тэҥҥэ күрэхтэстилэр. Бары көрүҥнэргэ пневматическэй саанан дуу, бэстилиэтинэн дуу ыталлар.

“Тииҥ” көрүҥ – 10 миэтирэттэн бастаан сытан эрэн, онтон тобукка олорон, онтон туран эрэ ытыы, икки араастаах: ПС – газ баллонунан иитиллэр бинтиэпкэнэн ытыы, үс балаһыанньаҕа уоннуута ыталлар, ВПп – уоһун тоһутан иитиллэр бинтиэпкэнэн ытыы, үс балаһыанньаҕа биэстиитэ ыталлар. Очукуо ааҕыллар сыалы ыталлар, сыаллар үс араас балаһыанньаҕа иилиллэр: сытан эрэ ытыыга аллараа, тобуктаан олорууга ортоку, туран эрэ ытыыга үөһэ.

Чемпионат кыайыылаахтара уонна призердара

Тииҥ-ПС, оскуола оҕолоругар:

  1. Иванов Вячеслав, Бүлүү
  2. Соловьева Татьяна, Хаҥалас
  3. Винокурова Анжела, Орто Халыма, “Патриот” кулууп

Тииҥ-ПС, бэтэрээннэр

  1. Трофимова Лира, Хаҥалас
  2. Константинов Михаил, Үөһээ Бүлүү
  3. Петрова Наталья, Төҥүлү

Тииҥ-ВПп

  1. Стручков Максим, Төҥүлү
  2. Александров Прокопий, М.К. Аммосов аатынан ХИФУ
  3. Борисов Федор, Хаҥалас

Тииҥ-ПС

  1. Трофимова Лира, Хаҥалас
  2. Петров Семен, Горнай
  3. Аржаков Михаил, М.К. Аммосов аатынан ХИФУ.

Бэргэн-ПП көрүҥ – 10 миэтэрэттэн бэстилиэтинэн электроннай сыалы ыталлар, сыал компьютергэ холбонор, компьютер сыалы салайар – хаһан холобонорун-арахсарын, хаста таппыккын ааҕар. Биир серияҕа биирдиилээн биэстэ ытаҕын, хас ытыы син ардылаах, сыал лаампата көҕөрдөҕүнэ ыта охсоҕун, умайар кэмигэр ыппакка хааллаххына, сыыспыт аатыраҕын. Таппыккын-сыыспыккын сыал лаампата хайдах уотунан умайарыттан быһаара тураҕын: кыһыл – сыыстыҥ, от күөҕэ – таптыҥ.

Бэргэн-ПП

  1. Гоголев Ярослав, Бүлүү
  2. Миссеева Диана, Дьокуускай, “Патриот” кулууп
  3. Кириллин Аян, Дьокуускай, “Патриот” кулууп.

Куруппааскы-ВПп – 10 миэтирэттэн уоһун тоһутан иитиллэр бинтиэпкэнэн ытыы. Саҕаланыытыгар отут миэтирэ сүүрэн кэлэн тобуктаан олорон электроннай сыалы биэстэ табыахха дылы ытаҕын, ытыы сүүрбэ биэстэн ордубат, биэстэ табан баран, эмиэ отут миэтирэ сүүрэн кэлэн туран эрэ электроннай сыалы биэстэ табыаххар диэри ытаҕын, ытыы сүүрбэ биэстэн ордубат. Бүтэһик табыыҥ кэннэ, компьютер бириэмэҕин бэлиэтиир. Ол бириэмэнэн миэстэҥ быһаарыллар. Бастакы түмүк кэннэ, алта киһи финалга тахсан эмиэ ити курдук күрэхтэһэллэр.

Куруппааскы-ВПп

  1. Стручков Максим, Төҥүлү
  2. Аржаков Михаил, М.К. Аммосов аатынан ХИФУ
  3. Александрова Сахаайа, М.К. Аммосов аатынан ХИФУ.

Саха ытыыга национальнай көрүҥнэригэр многоборье (Тииҥ-ПС, Бэргэн-ПП, Куруппааскы-ВПп)

  1. Петров Семен, Горнай
  2. Трофимова Лира, Хаҥалас
  3. Александрова Сахаайа, М.К. Аммосов аатынан ХИФУ.

Сүрүн ытыылар түмүктэммиттэрин кэннэ, И.М. Гурьев саҥа айбыт көрүҥнэригэр күрэхтэһии буолла: Снайпер-3 – бинтиэпкэнэн электроннай сыалы ытыы, бастаан 25 миэтирэттэн сытан эрэн биэстэ ытыы, онтон 18 миэтирэттэн тобуктаан олорон эрэ биэстэ ытыы, онтон 10 миэтирэттэн туран эрэ ытыы, үс түбүккэ холбоон ким элбэхтэ таппыт ытааччы кыайар. Снайпер-4 – бэстилиэтинэн ытыы, бу сырыыга очукуолаах сыалы ытыы, үс сыал Тииҥ платформатыгар аллараа балаһыанньаҕа ыйаналлар, биири 25 миэтирэттэн сытан эрэ, иккиһи 18 миэтирэттэн тобуктаан олорон, үсүһү 10 миэтирэттэн туран эрэ биэстиитэ ыталлар, ким элбэх очукуо хомуйбут, ол өрө буолар. Программа таһынан буоларын иһин, кыттааччылар бириискэ харчы уксаллар. Снайпер-3 икки бөлөххө араҕыста – бастакылар уксуулара үрдүк.

Снайпер-3, бастакы бөлөх

  1. Агапова Элиза, Дьокуускай, онус оскуола
  2. Макарова Римма, Хаҥалас
  3. Колодезников Николай, М.К. Аммосов аатынан ХИФУ.

Снайпер-3, иккис бөлөх

  1. Ефимов Петр, Хаҥалас
  2. Филатова Марина,
  3. Петрова Наталья, Төҥүлү.

Снайпер-4

  1. Кириллин Аян, Дьокуускай, “Патриот” кулууп
  2. Винокурова Анжела, Орто Халыма, “Патриот” кулууп
  3. Куприянов Пантелеймон, Дьокуускай, “Патриот” кулууп.

Саха сирин чулуу киһитин, Герой Федор Охлопков аатын Саха сирин билиҥҥи кэмин бэргэн ытааччылара бэрт сэргэхтик ааттаатылар! Оннук буола туруохтун!

Андрей ФИЛИППОВ – Хомпоруун.

Ааптар хаартыскаҕа түһэриитэ.

 

Добавить комментарий

Ваш адрес email не будет опубликован. Обязательные поля помечены *

201711
Бүгүн : 427