Радомир Сидоров 75 сааһыгар…

26.11.2023 Петр Павлов

Сэтинньи 24-25 күннэригэр Бэрдьигэстээххэ остуол тенниһигэр бэтэрээннэргэ Россия боруонса призера Радомир Сидоров 75 сааһын көрсө оҕолорго уонна улахан дьоҥҥо улуус аһаҕас күрэхтэһиитэ ыытылынна.

Эдэр спортсменнарга Кэптинтэн, Күөрэлээхтэн, Дьиикимдэттэн, Бэс Күөлүттэн, Бэрдьигэстээхтэн 40 оҕо бэйэтин күүһүн холонно.

Түмүккэ, 2010 с.т. кыргыттарга I миэстэни Аделина Максимова (Степан Ковров аатынан оскуола), II Риана Чемезова, III Вилена Федорова (иккиэн Сэмэн Данилов аатынан оскуола) ылла. Уолаттарга I Коля Сидоров (Кэптин), II Оскар Яковлев, III Толлуман Ноговицын (Степан Ковров аатынан оскуола).

2006-2009 с.с. т. кыргыттарга I миэстэҕэ Айгыына Сивцева (Василий Филиппов аатынан гимназия), II – Дайаана Семенова, III – Яна Потапова (Степан Ковров аатынан оскуола) таҕыста. Уолаттарга I миэстэ Артём Сидоров (Кэптин), II – Сулустаан Егоров (Сэмэн Данилов аатынан оскуола), III – Сидоров Савва (Кэптин).

Эр дьоҥҥо, бэтэрээннэргэ бу күн буруйдааҕын кытары араас күрэхтэһиилэргэ эриспит, тыҥааһыннаах киирсиилэри ааспыт уолаттар, аҕам саастаах, спорду өрө туппут убаастыыр дьоммут сүүрэ-көтө, эрчимнээхтик хамсана сылдьалларыттан киһи астынар. 83 саастаах Дьөгүөр Павлов туттара-хаптара сыыдамын, күүстээх “быһыытын”, эриэхэбэй “эрийиитин” киһи сөҕө көрөр. Эдэрдэр холобур эрэ оҥостуохпутун сөп.

Бэрт сытыы, тыҥааһыннаах хардарыта оонньуу кэнниттэн пьедестал үктэлигэр Валентин Петров (Бэрдьигэстээх), Вячеслав Данилов (Дьокуускай), Алексей Алексеев (Бэрдьигэстээх) таҕыстылар. Бэтэрээннэргэ бастакы миэстэни Василий Данилов, иккис Виктор Иванов (Дьокуускайтан), үһүс Иван Румянцев (Уус Алдан) ылла.

Күрэхтэһии кылаабынай судьуйатынан спорт бу көрүҥэ сайдарыгар үгүс үлэни ыыппыт, спорт бэтэрээнэ Анатолий Осипов үлэлээтэ.

Кыайыылаахтар уонна призердар Радомир Сидоров, биир дойдулаахтара, урбаанньыттар Зинаида Чемезова, Трофим Афанасьев, Андрей Михайлов олохтообут сыаналаах бириистэринэн наҕараадаланнылар. Спортсменнар күрэхтэһиинэн эрэ муҥурдаммакка, урукку кэмнэрин санаһан, ирэ-хоро кэпсэтэн спорт бу көрүҥэ сайдарыгар үлэ хайдах ыытыллыахтааҕын ырытыстылар. Радомир Сидоров айылҕаҕа сынньанарын, саха киһитин сиэринэн бултуурун-алтыырын сөбүлүүр. Кини бу бырааһынньыкка кэлбит ыалдьыттарга кус-хаас, мас көтөрүн бэлэх уунан соһутта.