Сонуннар

Ноговицыннар турнирдара 18-с төгүлүн ыытыллыаҕа

Биһиги, бырааттыы Ноговицыннар хапсаҕайга күрэхтэһиини аан бастаан аҕабыт Василий Павлович Ноговицын этии киллэрэн, кини 75 сааһыгар анаан, Дьааҥы оройуонун кырдьаҕас куоратыгар Верхоянскайга, 1998 сыллаахха тэрийэн ыыппыппыт.

Оччолорго Верхоянскай оройуон баһылыга Стручков Константин Николаевич көҕүлээһининэн, Саха сирин хапсаҕайга федерациятын эппиэттээх үлэһитэ Мостахов Алексей Егорович сөбүлэҥин биэрэн уонна тэрээһиҥҥэ саамай күүстээх үлэни убайым, оччолорго Верхоянскай оройуонун нефтебазатын дириэктэрэ Котельников Иван Иванович, чугас табаарыһым Верхоянскай оройуонун ДЮСШ дириэктэрэ, спортивнэй музей сэбиэдиссэйэ, Саха сирин тустууга үтүөлээх тириэнэрэ Портнягин Петр Васильевич, суруйааччы, суруналыыс, спорт бэтэрээнэ, Саха сирин хас да төгүллээх тустууга призёра Юмшанов Степан Иннокентьевич бу курэхтэһиини үрдүк таһымнаахтык тэрийэн ыыппыттара.

Ол кэмҥэ мин, ыраах Украина куоратыгар Киевкэ баар, Саха сирин Правительствотын представительствотыгар (Украина уонна Беларусь) сүбэһитинэн үлэлии сылдьар кэмим этэ, ол да буоллар, бу күрэхтэһиигэ анаан-минээн командировка оҥотторон айаннаан дойдубар кэлбитим.

Бу күн күрэхтэһии үөрүүлээх аһыллыытыгар, аҕабар 75 сааһынан уонна мин 45 сааспынан, Дьааҥы оройуонун бочуоттаах олохтоохторун аатын иҥэрбиттэрэ. Бу күн Саха сирин хапсаҕайга федерациятын вице-президена Алексей Егорович Мастахов биһиги бырааппытыгар Моисей Ноговицыҥҥа Дьааҥы оройуонугар хапсаҕайга бастакынан маастар буолбутун туоһулуур докумуону туттарбыта.

Күрэхтэһии олус үрдүк таһымнаахтык барбыта. Саха сирин бары күүстээх тустууктара: Васильев Максим, Стручков Василий-Абый Бааска, Андреев Анатолий уо.д.а. кэлэн кыттыбыттара. Кыайыылаахтар бары аҕам бэйэтэ бэлэмнээбит бэлэхтэрин ылан барбыттара.

Манна даҕатан эттэххэ, бырааттыы Ноговицыннар Республикатааҕы таһымнаах хапсаҕайга күрэхтэһиилэрэ Дьааҥы сиригэр-уотугар улахан дьоҥҥо барыта үстэ тэриллэн ыытыллыбыта.

Бу турнирбыт биирдэ Чурапчыга, мин 55 сааһым үбүлүөйүгэр анаан 2008 с. тэриллэн ыытыллыбыта. Онтон ыла сылын аайы бу күрэхтэһиибит Дьокуускай куоракка ыытыллар.

БЫЙЫЛГЫ күрэхтэһиини – Учуутал уонна наставник сылыгар, аҕабыт Василий Павлович Ноговицын 100 сааһыгар анаан, 18-с төгүлүн ыытан эрэбит. Бу үкрэхтэһии биир уратыта диэн, маастар нуормалаах уонна күрэхтэһии муҥутуур кыайыылааҕар тустубут эрэ уолаттар кыттар бырааптаахтар. Бу курэхтэһииттэн барыта 100-чэкэ хапсаҕайдьыт маастар нуорматын толорбута.

Быйылгы күрэхтэһиибитигэр барыта 6 ыйааһыҥҥа кырата 200-тэн тахса хапсаҕайдьыт кыттара сабаҕаланар. Саха сирин бары күүстээх тустууктара кэлэн кытталларын күүтэбит. Ол курдук, Хабаров Никита, Семенов Уйбаан, Власов Константин, Потапов Айсен, Христофор уо.д.а.

Түгэнинэн туһанан, махталбын  тиэрдиэм этэ, төрөөбүт дойдум Дьааҥы оройуонун салалтатыгар, чуолаан оройуоммут баһылыгар Иванов Владислав Михайловичка, Дьааҥы нэһилиэктэрин баһылыктарыгар, тустууну сөбүлүүр чааһынай тэрилтэлэр салаайаччыларыгар, бэйэм аймахтарбар, чугас дьоммор, бырааттарбар уонна бу күрэхтэһиини куруутун урдук таһымнаахтык тэрийэн ыытар, Саха сирин национальнай киинин “Модун” спортивнай дыбарыаһын салайааччыларыгар уонна үлэһиттэригэр, Саха сирин ФКиС министиэристибэтигэр, Саха сирин хапсаҕайга федерациятыгар, өссө төгүл бэйэм махталбын тиэрдэбин!

Маны этэн тураммын, манна биир үтүө дьыаланы бэлиэтиэхпин баҕарабын. Ол курдук, быйыл мин 70 сааспын туолбут үбүлүөйдээх сылбынан сибээстээн, аймахтарым, чугас табаарыстарым ахтыыларын хомуйан, сыл бүтүүтэ миэхэ анаммыт кинигэм суруллан тахсыахтаах.

Онно күүс-көмө буолбут Дьааҥым оройуонун салалтатыгар, Дьааҥы баһылыгар Иванов Владислав Михайловичка, Верхоянскэй куорат баһылыгар Садовников Михаил Михайловичка, бэйэм билигин үлэлии сылдьар ГБУ РС(Я) РЦСПСК РС(Я) салайааччытыгар Пахомов Михаил Дмитриевичка, ОАО “Немюгинский хлебзавод” генеральнай дириэктэригэр Нестеров Вячеслав Анатольевичка, ООО “Емеян” генеральнай дириэктэригэр Емельянов Ян Владимировичка, Чурапчыга оскуола интэринээккэ бииргэ үлэлээбит тустуу тириэнэрдэригэр, этэҥҥэ бу кинигэм бэчээттэнэн тахсарыгар кыһана-мүһэнэ, бэйэтин дууһатын ууран туран, ылсан үлэлии сылдьар, кинигэм ааптарыгар, бырааппар, чугас табаарыспар Дмитрий Афанасьевич Егоровка барҕа махталбын тиэрдэбин!

Саха сирин тустууктарыгар кэлэр олимпийскай сылга, Олимпиадаҕа тиийэн кытталларын, Саха сирин тустуута үйэлэр тухары үүнэ-сайда турдун!

Бары үчүгэйи кытта, Дьааҥы оройуонун, Верхоянскай куорат, Дулҕалаах нэһилиэгин бочуоттаах олохтооҕо, үлэ-спорт ветерана, Саха сирин үөрэҕириитин туйгуна, Саха сирин спорка туйгуна, Советскай Союз чемпионатын икки төгүллээх боруонса призёра, Советскай Союз 6-с норуоттар икки ардыларынааҕы Спартакиадатын боруонса призёра Михаил Васильевич НОГОВИЦЫН.

Дьокуускай, сэтинньи 10 күнэ, 2023 сыл.

Добавить комментарий

Ваш адрес email не будет опубликован. Обязательные поля помечены *

163120
Бүгүн : 93