Сонуннар

Муҥутуур кыайыылаахтар убаһанан наҕараадаланыахтара

Бу өрөбүл күннэргэ, ахсынньы 2-3 күннэригэр Тааттаҕа – ССРС, РСФСР спортарын маастара Владимир Андросов кэриэһигэр хапсаҕайга республикатааҕы турнир ыытыллар. Үгэскэ кубулуйбут, спорт бу көрүҥэр “А” таһымнаах, биир улахан күрэхтэһии 28-с төгүлүн буолар. Итиэннэ Саха сирин хапсаҕайга федерациятын үлэтин былаанын быһыытынан тэриллэр.

Түһүлгэни бэлэмнээн уонна тэрийэн ыытыыга Таатта улууһун хапсаҕайга федерацията (салайааччы П.Д. Рахлеев), Таатта улууһун дьаһалтата (баһылык А.С. Бурцев), Харбалаах нэһилиэгэ (баһылык А.У. Кулачиков), Таатта спорка тэрилтэтэ (салайааччы Н.М. Сабарайкин), Тааттатааҕы оҕо спортивнай оскуолата (дириэктэр Е.Е. Ноенохов) үүннээн-тэһииннээн, күүс-көмө буолан үлэлэһэллэр.

Таатта улууһун спорка тэрилтэтин салайааччы, биллиилээх теннисчит, спорт маастара Нюргун Сабарайкин биһиэхэ маннык иһитиннэрдэ:

-Турнир, балаһыанньа быһыытынан оҕолорго, эр дьоҥҥо уонна аҕам саастаахтарга, үс бөлөҕүнэн ыытыллар. Хас ыйааһын аайы бастаабыттар уонна иккис-үһүс буолбуттар тустаах мэтээллэринэн уонна грамоталарынан наҕараадаланыахтара. Ону тэҥэ эр дьоҥҥо уонна аҕам саастаахтарга бастыҥнар харчынан бэлиэтэниэхтэрэ. Маны таһынан эр дьоҥҥо уонна аҕам саастаахтарга түһүлгэ муҥутуур кыайыылааҕын быһаарар хапсыһыылар буолуохтара. Онно бастаабыттар – убаһанан наҕараадаланыахтара уонна бириистэрин тута илдьэ барыахтара. Олохтоохтортон Николай Иванов, Леонид Попов, Егор Захаров, Христофор Христофоров, Федор Постников, Михаил Дедюкин уо.д.а. кыттарга бэлэмнэнэ сылдьаллар. Турнир састаап өртүнэн күүстээх буолара күүтүллэр. Холобур, хаҥаластар сайаапкаларын көрдөххө, Прокопий Петров, Очиржап Очиржапов, Илья Тимофеев курдук күүстээхтэр бааллар.

Күрэхтэһиибит Харбалаахха, Культура уонна спорт киинигэр биир көбүөрүнэн ыытыллыа. Кылаабынай судьуйанан Николай Петрович Старостин ананна. Онон Владимир Андросов аатынан турнирбыт этэҥҥэ үчүгэйдик ыытылларыгар баҕарабыт.

«Дьулурҕан».   

Добавить комментарий

Ваш адрес email не будет опубликован. Обязательные поля помечены *

199040
Бүгүн : 331