Сонуннар

ГТО оонньууларын кыһыҥҥы күрэхтэһиитэ

Дьокуускай. Сэтинньи 18-19 күннэригэр «Динамо» спортивнай комплексыгар, Саха сиригэр физкультурнай хамсааһын тэриллибитэ 100 сылыгар анаммыт ГТО оонньууларын кыһыҥҥы республикатааҕы күрэхтэһиитэ буолан ааста.

Күрэхтэһиини үөрүүлээхтик аһыыга СР физическэй культураҕа уонна спорка министрин солбуйааччы Гаврил Мохначевскай ГТО нуорматын ситиһиилээхтик туттарбыт дьоҥҥо: нолуок сулууспатын управлениетын отделын начальнига Егор Аммосовка, «Арктика суоллара» тэрилтэ үлэһитэ Денис Припузовка, Дьокуускайдааҕы клиническэй балыыһа үлэһитэ Василена Артемьеваҕа, «Тобул» тэрилтэ салайааччыта Михаил Неустроевка, Лилия Егороваҕа анал бэлиэлэри уонна дастабырыанньалары туттарда.

Бастакы күн хамаанданан күрэхтэһии буолла. Барыта биэс хамаанда: «Бөҕөс», «СпортБаза», «Тимир», Дьокуускайдааҕы медицинскэй колледж уонна Чурапчы спортсменнара күрэс былдьастылар. Маныаха тыҥааһыннаах күрэхтэһии түмүгүнэн Егор Друзьянов, Гаврил Назаров, Александра Барашкова уонна Валерия Кобелькова састааптаах Чурапчы улууһун хамаандата бастаата. Иккис миэстэни «Бөҕөс» хамаанда, онтон үһүс бириистээх миэстэни «Тимир» хамаанда ыллылар.

Бу күрэхтэһии түмүгүнэн бастыҥ көрдөрүүлээх спортсменнар Саха сирин хамаандатыгар киллэриллэн, Бүтүн Россиятааҕы түһүлгэлэргэ кыттар кыахтаныахтара.

ГТО Саха сиринээҕи киинин салайааччыта Ариян Александров:

-Бастакы күн хамаанданан киирсии буолбута. Иккис күн биирдиилээн бастыыр иһин күрэхтэһиигэ Хаҥалас, Нам, Горнай, Бүлүү, Чурапчы уонна Дьокуускай спортсменнара, барыта 43 киһи кытынна. Күрэхтэһии саастарынан араарыллыбыт үс бөлөҕүнэн ыытылынна. Ол курдук, бастакы бөлөххө 18-35, иккискэ 35-45 уонна 45-тэн үөһэ саастаахтар күрэхтэстилэр. Ол түмүгүнэн Александра Барашкова, Николай Филиппов, Анатолий Горохов, Екатерина Беляева, Юрий Борисов, Елизавета Григорьева бастыҥ көрдөрүүлэри ситистилэр. Күрэхтэһии этэҥҥэ ааста, Бастыҥнар ахсынньы саҥатыгар Новгород куоракка ГТО оонньууларыгар барыахтаахтар – диэн бэйэтин санаатын үллэһиннэ.

Петр ПАВЛОВ.  

 

Добавить комментарий

Ваш адрес email не будет опубликован. Обязательные поля помечены *

161059
Бүгүн : 113