Сонуннар

Сырдык өйдөбүлбүт хаһан да өлбөөдүйүө суоҕа

// Кэриэстэбил

Дьылҕа Хаан, олох ыйааҕа кытаанах. Биир үтүө күн спорт бэтэрээнэ, “Дьулурҕан” хаһыат общественннай корреспондена Степан Федорович Лыткин соһуччу суох буолбутун туһунан хомолтолоох сураҕы истэн сүөм түспүтүм.

Олох аҕыйах хонуктааҕыта этэ дии, ватсаабынан суруйсан кэпсэтэ сылдьыбыппыт. Ити, улуу тренер Д.П. Коркин тустуутун кэнниттэн этэ. Степан Федорович: “Хайдах туһуннулар, Оҕонньор турнирыгар?” (09.09.2023) уонна “Виктор, маладьыас! Таджик да буоллар, бэйэбит оҕобут буоллаҕа” (11.09.2023) диэн суруйуута, кини миэхэ бүтэһик суруга буолан тахсар.

Степан Федорович Лыткин – спорт бэтэрээнэ, чэпчэки атлетикаҕа Саха Республикатын, марафоҥҥа сүүрүүгэ Россия спордун маастара. Уһун дистанцияҕа сүүрүүгэ Саха сирин элбэх төгүллээх чемпиона. «Туймаада-Эркээни» экологическай сүүрүү төрүттээччитэ. Аҕам саастаахтарга Россия, Европа, аан дойду чемпионаттарын кыайыылааҕа. «Дьулуур» сүүрүүнү таптааччылар кулууптарын салайааччыта. Идэтинэн – геолог, эколог.

Степан Лыткин спорка дьарыгын тустууттан саҕалаабытын баҕар сорохтор билбэттэрэ буолуо. Оскуолаҕа үөрэнэ сылдьан көҥүл тустуунан дьарыктаммыт. Оскуола күрэхтэһиитигэр, табаарыстыы көрсүһүүлэргэ, оройуон чемпионатыгар бэрт ситиһиилээхтик кыттыбыт. Кэлин республика биллиилээх маастардара буола үүммүт Алексей Атласовы, Юрий Николаевы, уо.д.а. күүстээх бөҕөстөрү кытта иэмэх мастыы эрийсибит.

Саха государственнай университетыгар үөрэнэ сылдьан көҥүл тустуунан дьарыгын сөргүппүт. Биллиилээх тренердэр Н.Н. Волков, Н.К. Алексеев салалталарынан эрчиллибит. «Спартак» уопсастыба уобаластааҕы күрэхтэһиитигэр миэстэлэһэн, бастакы разряд нуорматын толорбут. СГУ икки төгүллээх чемпиона буолбут. Кэнникитин 1971 сыллаахха 52 киилэҕэ бастаабыт. Бу сыл төбөтүгэр эчэйии ылан, быраастар кинини көҥүл тустуунан дьарыктаныытын боппуттар. Ол иһин аны сүүрүүнэн дьарыктанар буолбут.

Үөрэҕин бүтэрэн баран, бастаан Дьааҥыга ананан үлэлээбит. Онно бастакы сылларыгар Игорь Кудрявцев салалтатынан тустуунан эрчиллиитин салҕаабыт. Баатаҕай чиэһин көмүскээн оройуон күрэхтэһиитигэр хаста да миэстэлэспит. Бүтэһигин 1980 сыллаахха иккис буолбут.

Ити туһунан, Степан Федорович, миэхэ 2009 сыллаахха «Олоҕум кэрэ түгэннэрэ» диэн кинигэтин илии баттаан бэлэхтээбититтэн ыллым.

… Ол аата, аҕа саастаах доҕорбун бу сайын “Туймаада” стадион таһыгар көрсүһүүм бүтэһик көрүүм буоллаҕа. Онно кини илиитэ гипсэлээх сылдьар этэ. Үгэһинэн, кэнники ыытыллыбыт чэпчэки атлетика күрэхтэһиилэрин тэрээһинин туһунан кэпсэппиппит. Онно, сотору кэминэн кини суох буолуо диэн санаа хантан кэлиэй?!

Степан Федорович – спорт эйгэтэ республикаҕа туспа хаһыаттаах буоларын туһугар, “Дьулурҕан” хаһыаты өйөөн элбэхтэ суруйбута, спорт министиэристибэтигэр тиийэ туруорсубута. Бэйэтэ хаһыат көхтөөх көмөлөһөөччүтэ этэ. Бэтэрээннэр спортарын, чэпчэки атлетика күрэхтэһиилэрин туһунан сиһилии, хас биирдии спортсмены билиһиннэрэн туран суруйара.

Бу дьыл алтынньы 9 күнүгэр Степан Федорович 75 сааһын бэлиэтиэхтээҕэ…

Аҕа табаарыспыт, спорт бэриниилээх киһитэ – Лыткин Степан Федорович туһунан биһиги сырдык өйдөбүлбүт хаһан даҕаны өлбөөдүйүө суоҕа. “Олоҕум кэрэ түгэннэрэ” кинигэтэ, хаһыакка суруйуулара кинини куруук саната туруохтара.

“Дьулурҕан” көхтөөх көмөлөһөөччүлэрэ, ааптардара көҕүрүү, бу олохтон туоруу тураллара наһаа даҕаны хомолтолоох.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *

161089
Бүгүн : 143