Сонуннар

Сардаана тулуурун, дьулуурун киллэрэн туран сүүрбүтэ

Саха сирин олохтоохторо бары билэрбит курдук, Сардаана Трофимова марафоҥҥа сүүрүүгэ Россия биэс төгүллээх чемпионката. Иккитэ Олимпийскай оонньууларга путевка ыла сылдьыбыта даҕаны, Россияҕа спорка санкцияны биллэрбит буоланнар, икки Олимпиадаттан субуруччу маппыта.

Спорт эйэлээх сыаллааҕын, Россияҕа санкция сөбө суоҕун туһунан өйдөбүл суоҕуттан, Сардаана тренеринээн, спорт үтүөлээх маастара Татьяна Юрьевна Жирковалыын, куруутун дьарыктанар сирдэриттэн – Кыргызстантан кыттарга быһаарыммыттара. Кыргызстаҥҥа гражданство ыланнар, Азия оонньууларыгар кыттар кыаҕы ылбыттара.

Оонньуу Кытайга ыытыллар буолан, бу дойду сүүрүүктэрэ күүскэ киирсэн сүүрүөхтэрин билэллэрэ. Ону таһынан, Бахрейн, Япония сүүрүүктэрэ Азия күрэхтэһиилэригэр өрүү ситиһиилээхтик кытталлара биллэрэ.

Алтынньы 5 күнүгэр Кытайга марафонецтар +25 кыраадыс сылааска сүүрбүттэрэ. Марафон, Кытай бириэмэтинэн сарсыарда 7.00 чаастан, Саха сирин бириэмэтинэн, 8.00 чаастан саҕаламмыта. Саха сирин сүүрүүнү сөбүлээччилэрэ, бука бары бу марафонскай сүүрүүнү кэтээн көрбүппүт, Сардаанаҕа ыалдьан бөҕө буолбуппут.

Старт бэриллээтин кытары, инники күөҥҥэ тоҕус сүүрүүк лидердээн барбыта. Кинилэр ортолоругар биһиги Сардаанабыт тэбис тэҥҥэ, илин-кэлин түһүспүтэ. “Марафон 35 килэмиэтиртэн саҕаланар” дииллэринии, 35-с килэмиэтир кэнниттэн биэс күүстээх марафонецтар хааланнар, күрэс былдьаһыыларын салҕаабыттара. Дьэ, манна олох атын, күүстээх тиэмпэлээх сүүрүүлэр буолбуттара. Бахрейнтан сүүрэр марафонец Кенияттан төрүттээх эбит, кинини кытары Сардаана тэбис тэҥҥэ, эрбии биитинии киирсибитэ. Сүүрүү саҕаламмыта иккис чааһыгар, күн өссө сылыйан, куйаас дойдуга төрөөбүт Кения сүүрүүгэ сыыйа аттар атан, инники барбыта.

Сардаана бу киирсиигэ элбэх сэниэтин бараатар даҕаны, Сахатын сирин санаан, кини спорду сөбүлээччилэрэ куруутун киниэхэ эрэнэллэрин, ыалдьалларын билэрэ. Кэнниттэн икки китаянка уонна японка биһиги Сардаанабыт, Кенияттан төрүттээх Бахрейн сүүрүүгүнээн киирсиилэрин түмүгэр, сылайыы баарын уонна Сардаана соҕотоҕун иккис сүүрэн иһэрин, үс элитнэй результаттаах марафонкалар үһүөн, бэйэ-бэйэлэригэр көмөлөһөн, соҕотоҕун, ким даҕаны аттыгар сүүрэр өйөбүлэ суох Сардаанабытын эккирэтэн барбыттара. Кытайдар, икки кыргыттарыгар ыалдьан хаһыы-ыһыы бөҕөтө буолбуттара. Ону истибиттии, китаянкалар дьэ ситиэхчэ сиппэккэ испиттэрэ уонна кинилэри көҕүлүүр курдук, японка марафонеһа илин-кэлин түсүһэн, күүс-көмө буолбута.

Сардаана соҕотоҕун, үс сүүрүүк кинини кэнниттэн эккирэтэн иһэллэрин, кини көмөтө суох да буоллар, туох баар тулуурун, дьулуурун киллэрэн туран сүүрбүтэ. Бүтэһик биэтэккэ, олохтоох Кытай ыалдьааччыларынан өйөбүллээх, дойдулаах кыыс Сардаана иннигэр түспүтэ. Сардаана туох баар күүһүн түмэн, биэтэккэ үһүс миэстэҕэ таҕыста, төрдүс – китаянка, бэһис – японка буолуталаатылар.

Ити курдук, саха кыыһа Сардаана Трофимова, Саха сирин спордун историятыгар бастакынан Азия XIX оонньууларыгар үһүс бириистээх миэстэҕэ тахсан, боруонса мэтээл хаһаайынынан буолан, Сахабыт сирин спорка историятыгар сөҕүмэр улахан ситиһиини аҕалла, республикабыт спордугар кыһыл көмүс буукубанан суруллар чиэскэ тигистэ.

Артур ФЕОФАНОВ, чэпчэки атлетикаҕа сахалартан ССРС спордун бастакы маастара, Саха Республикатын үтүөлээх тренерэ.

Добавить комментарий

Ваш адрес email не будет опубликован. Обязательные поля помечены *

186561
Бүгүн : 265