Тус санаа

Бэлэхтэн үөскээбит санаалар…

Спорт таҥаһын атыытынан дьарыктанар IRON тэрилтэ салайааччыта Василий Ноговицынтан бэлэх туттум. Таҥас буолбатах, спорт туһунан саҥа сурунаал. Ол миэхэ, кумааҕы ыарыылаах киһиэхэ күндү бэлэх.

Бу эдэр эрээри, номнуо киэҥ эйгэҕэ биллибит тэрилтэ аны бэйэтэ Саха сирин спордун туһунан өҥнөөх сурунаал таһаарар эбит. Сүрдээх үчүгэй! Ол аата, кинилэр аныгы олоххо сайдыыны батыһан, ыраас-чэбэр, чэгиэн-чэбдик олоххо дьону умсугутар үлэлэрэ, өссө билиигэ-көрүүгэ угуйар киэҥ эйгэлээҕин көрдөрөр. Спорт таҥаһын оҥоруунан дьарыктанар тэрилтэ бу саҥа бырайыага өйөнүөн баҕарабын. Саха сирэ – спорка үтүө үгэстээх республика. Сыллата улахан таһымнаах элбэх күрэхтэһиилэр ыытыллаллар, спорка сыһыаннаах үгүс тэрээһиннэр тэриллэллэр, саалалар дьэндэйэн тахсаллар…

Холобур, быйыл улуу тренербит Дмитрий Петрович Коркин төрөөбүтэ 95 сылыгар анаан араас өрүттээх тэрээһиннэр ыытылыннылар уонна ыытыллаллар. Ол курдук, көҥүл тустууга норуоттар икки ардыларынааҕы турнир буолла, научнай-практическай конференция ыытылынна, саҥа кинигэлэр бэчээттэнэн таҕыстылар, республикатааҕы быыстапка тэрилиннэ, спектакль туруорулунна, аны өссө киинэ көстүөҕэ.

Ити, хайдахтаах курдук, киэҥ хабааннаах, үгүс өрүттээх кэрэ бэлиэ түгэний?! Манна туһааннаах тэрилтэлэр, үлэһиттэр эрэ буолбакка, республика барыта хамсанар, сүүрэр-көтөр.

Дьэ, ол тэрээһиннэр барыта, олохпут тэтимин быһыытынан кэмигэр суруналыыстар өттүлэриттэн сырдатыллан, суруллан, көрдөрүллэн иһэллэрэ – билиҥҥи кэм ирдэбилэ. Онуоха үлэ син ыытыллар эрээри, бэчээтинэй бородууксуйа быһыытынан ситэ кыаллыбат диэхпин баҕарабын. Спорт туһунан суруйар соҕотох “Дьулурҕан” эрэ хаһыат баар. Ол, бэйэтин дьаалатынан, “Сахабэчээт” тэрилтэ өйөбүлүнэн тахсар. “Дьулурҕан” кыһалҕата элбэх, ол туһунан бу сырыыга буолбатах…

Оттон сурунаал суоҕун тэҥэ этэ. Урукку сылларга суруналыыс Владислав Коротов “Сахаспорт” диэн сурунаалы таһаарара, ол тохтообута. Иван Барашков “Первый, борцовский” сурунаала эмиэ өйөбүлү ылбакка, тахсыбатаҕа ыраатта. Ат спорда, бокса көрүҥнэрэ эмиэ сурунаал таһаара сылдьыбыттара. Ол барыта билигин суох. Саҥа кэм, саҥа салайааччылар өйөөбөттөр, өйдөөбөттөр бадахтаах. Билигин барыта үрүт үөһэ сайт да, сайт эрэ. Мин тус санаабын сыһыаннаах дьон туох дииргит буолла?

Онон бу эйгэҕэ, IRON тэрилтэ бырайыага кэскиллээх буолуон сөп. Туох барыта саҕалааһынтан тутулуктаах. IRONTIME сурунаал таһаарааччыларыгар туһаайан эттэххэ, уостан, симэлийэн хаалбакка, күннэтэ ситимнээхтик, айымньылаахтык үлэлээн, саха бэчээтигэр биир биһирэнэр сурунаал буоларгытыгар баҕарабын! Бэлэххит иһин махтал!

Петр ПАВЛОВ.              

Добавить комментарий

Ваш адрес email не будет опубликован. Обязательные поля помечены *

176537
Бүгүн : 103