Сонуннар

Александр Крылов турнира: Түмүк хайдаҕый?

Дьокуускай. Спорт маастара, Ил Түмэн депутатынан талыллан үлэлии сылдьыбыт «Строительнай» рынок салайааччыта, республикаҕа көҥүл тустуу сайдыытыгар сүҥкэн өҥөлөөх Александр Владимирович Крылов кэриэһигэр Бүтүн Россиятааҕы иккис турнир ыытыллан түмүктэннэ.

Быйылгы түһүлгэҕэ дойду сэттэ регионуттан уонна Монголияттан барыта 91 бөҕөс күөн көрүстэ. Саха сириттэн 60 киһи кытынна. Түмүккэ бөҕөстөрбүт барыта 20 мэтээли ылары ситистилэр (3 кыһыл көмүс, 7 үрүҥ көмүс, 10 боруонса). Бастакы ыйааһыҥҥа быһаарыылаах хапсыһыыга ини-бии Копыловтар көрсүөхтээх этилэр даҕаны, кыайыы Алексейга быһа бэрилиннэ.

Ыйааһын ахсын бастаабыттар – 70-нуу, иккис буолбуттар – 50-нии, үһүстээбиттэр – 30-туу уонна кыайыылааҕы бэлэмнээбит тренердэр 20-лии тыһ. солк. харчынан бэлиэтэннилэр. Кыайыылаахтары наҕараадалааһын кэнниттэн, бу түһүлгэ сүрүн бирииһин – 1 мөлүйүөн солк. харчыны оонньотуу ыытылынна. Онуоха бары ыйааһыннарга бастаабыттар сыанаҕа тахсан, анал иһиттэн шариктары ылбыттарын кэнниттэн, тэҥнээн көрүү буолбутугар – 74 киилэҕэ бастаабыт Бурятия бөҕөһө Тумэн Бодиев тарбаҕар талааннаах буолла! Кини түһүлгэ сүрүн бирииһин ылла.

Күрэхтэһии сүрүн наҕараадатын кэнниттэн спонсордар олохтообут аналлаах бириистэрин туттарыы буолла. Ол курдук, Любомир Ашеин 100, Петр Копылов 50 тыһ. солк. харчынан, онтон Никита Хабаров убаһанан наҕараадаланнылар.

Бу иккис сылын ыытыллар дойду таһымнаах тэрээһини Дьокуускай куорат спортивнай тустууга федерацията, Өймөкөөн улууһа, “Строительнай” рынок, А.В. Крылов чугас дьоно уонна доҕотторо кыайа-хото тутан үрдүк тэрээһиннээхтик ыыппыттарын бэлиэтиир тоҕоостоох.

Турнир түмүгэ:

57 кг: 1. Петр Копылов, 2. Алексей Копылов, 3. Уйгулаан Иванов, 3. Айаал Белолюбскай (бары – Саха сирэ).

61 кг: 1. Кежик Монгуш (Иркутскай/Тыва), 2. Александр Авелов (Саха сирэ), 3. Артур Чебодаев (Красноярскай), 3. Михаил Иванов (Саха сирэ).

65 кг: 1. Кежик Чымба (Красноярскай/Тыва), 2. Дьулусхан Тотонов (Саха сирэ), 3. Эзир Тюлюш (Тыва), 3. Николай Баарт (Саха сирэ).

70 кг: 1. Сайын Казырык (Тыва), 2. Сергей Якимов (Иркутскай), 3. Константин Капрынов (Саха сирэ), 3. Сандан Гармаев (Бурятия).

74 кг: 1. Тумэн Бодиев (Бурятия), 2. Айсиэн Потапов (Саха сирэ), 3. Рамазан Якубов (Красноярскай), 3. Иннокентий Бабаранов (Саха сирэ).

79 кг: 1. Никита Сучков (Красноярскай), 2. Мгер Кочоян (Приморскай кыраай), 3. Андриан Ленскэй (Саха сирэ).

86 кг: 1. Дмитрий Зайнидинов (Красноярскай), 2. Эмиль Рамазанов (Хабаровскай), 3. Буянто Шадапов (Бурятия), 3. Дьулустаан Калачёв (Саха сирэ).

92 кг: 1. Максим Толмачев (Саха сирэ/Красноярскай), 2. Никита Софронов, 3. Софрон Софронов (иккиэн – Саха сирэ).

97 кг: 1. Никита Акулиничев (Красноярскай), 2. Евгений Аронов, 3. Айтал Уйгуров (иккиэн – Саха сирэ).

125 кг: 1. Никита Хабаров, 2. Эдуард Максимов (иккиэн – Саха сирэ).

PS: Түһүлгэ сорох хапсыһыыларын манна https://www.youtube.com/c/Dzulurgan көрүөххүтүн сөп.

Петр ПАВЛОВ.

Ааптар хаартыскаҕа түһэриитэ.

Добавить комментарий

Ваш адрес email не будет опубликован. Обязательные поля помечены *

186572
Бүгүн : 276