Сонуннар

Александр Крылов турнира: Финалга кимнээх таҕыстылар?

Дьокуускай. «Өрөгөй» Спорка бэлэмнэнии киинигэр спорт маастара, Ил Түмэн депутатынан талыллан үлэлии сылдьыбыт, республикаҕа тустуу сайдыытыгар сүҥкэн өҥөлөөх Александр Владимирович Крылов кэриэһигэр көҥүл тустууга Бүтүн Россиятааҕы иккис турнир бастакы күнүнээҕи күрэхтэһиитэ түмүктэннэ.  

Быйылгы түһүлгэҕэ мандатнай хамыыһыйа иһитиннэриитинэн барыта 91 бөҕөс – Приморскай, Красноярскай, Хабаровскай кыраайдартан, Иркутскай, Московскай уобаластартан, Бурятия, Тыва, Хакасия, Саха республикаларыттан уонна Монголияттан күөн көрсөллөр. Кинилэр ортолоругар Россия спордун норуоттар икки ардыларынааҕы кылаастаах 4 маастара, Россия спордун 25 маастара бааллар.

Бастакы күн икки көбүөрүнэн киирсиилэр түмүктэригэр ыйааһыннарга кыайыылаах аатын кимнээх былдьаһаллара быһаарылынна. Арай, 79, 92 уонна 97 кг кыттааччылара аҕыйах буолан, күрэхтэһии эргиир систиэмэтинэн ыытылынна. Онуоха Саха сирин хамаандатыттан финалга Алексей, Петр Копыловтар, Александр Авелов, Дьулусхан Тотонов, Айсен Потапов таҕыстылар. Онтон эргиир систиэмэтинэн ыытыллыбыт ыйааһыннартан Максим Толмачев (92 кг) билиҥҥи балаһыанньата үчүгэй, киниэхэ биир хапсыһыы хаалла. Итини тэҥэ, ыарахан ыйааһыҥҥа икки эрэ кыттааччы баар, иккиэн бэйэбит уолаттарбыт.

Күрэхтэһии буолан баран, сытыы бырахсыылаах, көһүтүллүбэтэх түгэннээх буолла. Ордук, билиҥҥи кэмҥэ тумус туттар тустуукпут Константин Капрынов тувинец Сайын Казырыгка хотторуута соһуччу кэриэтэ буолла. Улахан үөрүйэхтээх, норуоттар икки ардыларынааҕы кылаастаах спорт маастара бу түһүлгэҕэ син былырыыҥҥытын курдук үчүгэйдик оҥостон кэлбит. Соторутааҕыта диэри 74 киилэҕэ кыттар киһи, Крылов турнирыгар ыйааһынын түһэринэн, хайаан да бастыырдыы былааннаммыт.

Кини Капрыновтыын тустуутугар бастакы түһүмэххэ 3:0 ахсаанынан баһыйбыта. Онтон иккис түһүмэх ортотугар Константин ахсааны тэҥнээн (3:3) итиэннэ быраабыла быһыытынан бааллы кэнникинэн ылбытынан кыайар балаһыанньалаах сылдьан, хапсыһыы бүтэрэ бэрт кыра бириэмэ хаалбытыгар атахха киллэттэрэн кэбиһэн, түмүккэ кыл мүччү 3:5 ахсаанынан хотторон хаалла. Дьэ, кыһыылаах хотторуу.

Финалга тахсар иһин хапсыһыыга Казырык аны бурят Упхоевка эмиэ сабырыттаран иһэн, олох бүтэһик сөкүүндэлэргэ очукуо ылан, кылбар кыайыыны ситистэ. Онон, тувинец кистэнэ сылдьар кыахтааҕа, хаһан баҕарар төлө биэрэн наадалаах кэмҥэ очукуону ылара – кини сөптөөх тактиканы тутуспутун бэлиэтэ. Этэргэ дылы, бүтэһик сөкүүндэлэргэ диэри, кыайдыбыт дии санаабыт утарсааччыларын сэрэхтэрин сүтэриилэригэр биирдэ кымньыылыы хамсанан, кылбар кыайыылары ситистэ. Онон Константин Капрынов сарсын үһүс миэстэ иһин Упхоевтыын тустуоҕа.

Финалга көрсүөхтэрэ:

57 кг: Алексей Копылов – Петр Копылов (иккиэн – Саха сирэ)

61 кг: Кежик Монгуш (Иркутскай/Тыва) – Александр Авелов (Саха сирэ)

65 кг: Дьулусхан Тотонов (Саха сирэ) – Кежик Чымба (Красноярскай/Тыва)

70 кг: Сайын Казырык (Тыва) – Сергей Якимов (Иркутскай)

74 кг: Айсен Потапов (Саха сирэ) – Тумэн Бодиев (Бурятия)

79 кг: эргиир систиэмэтэ

86 кг: Эмиль Рамазанов (Хабаровскай) – Дмитрий Зайнидинов (Красноярскай)

92 кг: эргиир систиэмэтэ

97 кг: эргиир систиэмэтэ

125 кг: Никита Хабаров – Эдуард Максимов (иккиэн – Саха сирэ).

Сарсын күрэхтэһии 16:30 саҕаланар. Бастаан «уоскутар» бөлөх тустуулара, онтон салгыы быһаарыылаах хапсыһыылар, кыайыылаахтары наҕараадалааһын уонна 1 мөлүйүөннээх Сүрүн бирииһи оонньотуу буолуохтара.

Петр ПАВЛОВ.

Ааптар хаартыскаҕа түһэриитэ.

Добавить комментарий

Ваш адрес email не будет опубликован. Обязательные поля помечены *

161112
Бүгүн : 166