Сонуннар

Үрдүкү лигаҕа тахсар түһүлгэ бастыҥнары быһаарда

Саахымат оонньуутугар Саха Республикатын чемпионата 1-кы лигатын классическай программаҕа түһүмэҕэ алтынньы 13 күнүгэр түмүктэннэ.

Уопсайа 52 кыттааччы республикабыт 9 оройуоннарыттан (улуустарыттан) уонна Дьокуускай куораттан, 2 спорт маастардара, 14 маастарга кандидаттар уонна маассабай разрядтаах оонньооччулар кыттыыны ыллылар.

Быйылгы дьылга саахыматчыттар оонньуур таьымнара лаппа күүһүрбүт, састаап олус эриэ-дэхси,  тэбис-тэҥник хатыһыылаахтык, кыайыы очколара хомулланнар бүтэһик туурдарга тиийэ сэниэлэрин, толкуйдарын хомунаннар, ким инники буоларыгар күөн көрүстүлэр.

Кыргыттар (Евдокия Избекова, Ньургуйаана Баишева, Полина Пак, Виктория Степанова, Арина Васильева, Анастасия Никитина) олус кыахтаах оонньуулары бэлэхтээтилэр. Кыра саастаах уолаттартан Александр Иванов, Эрчим Мегежекскэй, Артур Васильев үчүгэйдик киирсэннэр, саахымат кистэлэҥ ньымаларыгар оонньуур албастарын эбиннилэр.

Быһаарыылаах бүтэһик туур кэнниттэн кыайыылаахтар билиннилэр. Дьокуускай куораттан 7,5 очкону ылбыт Нариман Мустафин кыайыылааҕынан буолла, сэттэлии очколаах иккис миэстэҕэ Чурапчы аатыттан оонньообут Николай Капитонов тигистэ, үһүс миэстэҕэ Уус Алдан чиэһин көмүскээбит Евдокия Избекова буолла.

Бу үс кыайыылаахтары үрдүкү лига түһүлгэтигэр кэтэһэн олороллор: Дмитрий Егоров (Дьокуускай), Денис Назаров (Мэҥэ Хаҥалас), Айсен Местников (Дьокуускай), Арсений Чумаевскай (Дьокуускай), Альберт Постников (Дьокуускай).

Былырыыҥҥы чемпионакка биэс иһигэр киирбиттэр; Владимир Макаров (Нам), республикатааҕы Е.К. Охотин мемориалын кыайыылаҕа Владислав Жирков (Дьокуускай), Дьокуускай куорат 2023 с. чемпиона Гумар Моисеев (Дьокуускай), Саахымакка “Северное сияние” фестиваль кыайыылааҕа, 12 оонньооччуну саахымат федерациятын президиума мунньахтаан быһаарыы ылыахтаахтар.

Салгыы 6,5 очколаах Роман Ганжуров (Дьокуускай), Иннокентий Сивцев (Нам), аҕыс саахыматчыт – алталыы очко, сэттэ оонньооччу – 5,5 очколаах 1-кы лига саахымакка чемпионатын түмүктээтилэр.

Анал бириис хаһаайыттара: уолаттарга – Александр Иванов, кыргыттарга – Полина Пак, дьахталларга – Ньургуйаана Баишева, эр дьоҥҥо 60-тан үөһэ ветеран саастаахтарга – Семён Местников уонна кырдьаҕас ветераннарга, 70-тэн үөһэ саастаахтарга – Светлана Захарова, Александр Жу.

Гаврил ВИНОКУРОВ, республикатааҕы Саахымат-дуобат киинин инструктора, күрэхтэһии сүрүн судьуйата.

Добавить комментарий

Ваш адрес email не будет опубликован. Обязательные поля помечены *

176510
Бүгүн : 76