Сонуннар

Улуу тириэнэр Д.П. Коркин турнирыттан кылгас бэлиэтээһиннэрим

Быйыл иккис сылбын Дмитрий Петрович Коркин норуоттар икки ардыларынааҕы көҥүл тустууга аһаҕас турнирыгар толору сылдьан сэргээн баран көрдүм-иһиттим. Былырыын оскуола үөрэнээччитин, быйыл ХИФУ студенткатын быһыытынан. Ону таһынан биллиилээх, ааттаах-суоллаах спортсменнары кытта хаартыскаҕа түстүм.

Кыраныысса таһыттан 15 судаарыстыба спортсменнара биһиги хоту кыраайбытыгар кэлэн бардылар. Олортон биир саамай үрдүк ситиһиилэрдээх Иран тустууктара буоллулар. Онтукайым оруобуна трибунаҕа, кэннибэр Иран сүүмэрдиир хамаандата олорон биэрбитэ. Кинилэри кытары кэпсэтэ сатаатым да, ол эрэн дьоммунаан өйдөспөтүм. Хата, биир нууччалыы билэр киһилээх буолан биэрдилэр, кини Иран туһунан билиһиннэрэн, спортсмен эдэр уолаттар тустарынан кэпсээн барда.

Уопсайынан, Иран 88 мөлүйүөн кэриэтэ нэһилиэнньэлээх ислам судаарыстыбата. Сирдэрэ кыһына суох сылаас, үксэ хайалаах дойду. Азербайджаны, Ирагы, Пакистаны о.д.а. судаарыстыбалары кытары кыраныыссалаһар. Тустууну олус сэҥээрэллэр, сөбүлүүллэр, өйдүүллэр. Уопсайынан, эт-хаан, күүс-уох өртүнэн сайдыылаах, кыахтаах-уохтаах омук буолар. Манна 18-23 саастаах эдэр юниор тустууктарын аҕалбыттар.

Олортон биирдэстэрэ 125 киилэҕэ күрэхтэһээччилэрин кыайа, баһыйа туппут 18 саастаах, 195 см үрдүктээх, оҕолорго түөрт төгүллээх аан дойду чөмпүйүөнэ Амирреза Масуми тус бэйэбин сүрдээҕин соһутта, ыарахан ыйааһыҥҥа кэскиллээх, инникилээх бөҕөс баарын биллэрэн тахсан эрэрин, элбэх киһи бэлиэтии көрбүтүн саарбаҕалаабаппын. Иран тустууктара таһымнара күнтэн түүн үрдүү турарын өссө төгүл дакаастаатылар диэххэ наада. Саха сиригэр успуорду өрө туталлар эбит, адьас  бырааһынньык курдук диэн  сөҕөллөр уонна сэҥээрэллэр.

Биллэн туран, Кавказ омуктар эмиэ буолуохтааҕын курдук үс бириистээх миэстэҕэ бэркэ киирсэн, бэйэлэрин миэстэлэрин булан олордулар, уоттаахтык-күөстээхтик, сытыы, хабыр хапсыһыылары көрдөрдүлэр. Онтон сахалартан түөрт уолбут финалга, бастакы миэстэни былдьаһар иһин кииристилэр. Биир бастыҥ, киэҥ туттар спортсмеммыт Виктор Рассадин алтыс төгүлүн Коркин турнирын кыайыылааҕа буолла, эбиитин “Үрүҥ көмүс борцовка” анал бириис хаһаайынынан таҕыста. Роман Николаев, Ньургун Сергин уонна Константин  Капрынов иккис бочуоттаах миэстэҕэ тигистилэр.

Түмүктээн, даҕатан эттэххэ, улуу тренербит Д.П. Коркин төрөөбүтэ 95 сылыгар аналлаах  көҥүл тустууга  турнирбыт үрдүкү таһымҥа, бэрт чаҕылхайдык, уратытык ааста. Сылын ахсын тас, атын дойдуттан кэлбит спортсменнар кэлэн күрэҕи киэргэтэн  бараллара киһини үөрдэр уонна биһирэтэр.

Милена АНДРЕЕВА, ХИФУ норуоттар тылларын уонна культураларын институтун студентката.

 

 

 

Добавить комментарий

Ваш адрес email не будет опубликован. Обязательные поля помечены *

160223
Бүгүн : 123