Сонуннар

Тустуу бүттэ, тустуу салҕанар…

Үтүөлээх тренербит Дмитрий Петрович Коркин аатынан улахан таһымнаах күрэхтэһиибит үрдүк тэрээһиннээхтик ыытыллан бүтэ охсон хаалла.

Бары билэргит курдук, саха тустууга кыһатын иитиллээччилэрэ бу күрэхтэһиигэ барыта 6 мэтээли ылары ситистилэр. Ол курдук, Таджикистан аатыттан аан бастакытын күрэхтэһиигэ сүрэхтэммит Виктор Рассадин 70 киилэҕэ тэҥнээҕин булбата. Саха сирин сүүмэрдэммит хамаандатын саҥа хапытаана Константин Капрынов (70 кг), 18 саастаах Роман Николаев (79 кг), Ньургун Сергин (92 кг) иккис миэстэлэннилэр. Онтон Алексей Копылов (57 кг) уонна Василий Кириллин (79 кг) үһүс бириистээх миэстэҕэ таҕыстылар.

Тустууну таптааччылар наҕылыйан хаалбаппыт. Тустуу бүппэт, тустуу эмиэ салҕанар. Балаҕан ыйын 14-18 күннэригэр Нарофоминскайга 24-гэр диэри саастаах бөҕөстөр Россияҕа бастыыр иһин күрэхтэһиилэрэ ыытыллар. Чуолаан бу күрэхтэһиигэ ситиһиилээхтик кыттарга сыал-сорук оҥостон Лев Павлов, Владимир Бояновскай, Станислав Свинобоев, Никита Хабаров курдук күүстээх уолаттар Коркин турнирын көтүттүлэр. Бу күрэхтэһии түмүгүнэн дойду хамаандата талыллан, Албанияҕа буолуохтаах аан дойду түһүлгэтигэр кыттара күүтүллэр.

Ону тэҥэ, балаҕан ыйын 16-19 күннэригэр Сербия киин куоратыгар Белградка 2023 сыл көҥүл тустууга саамай тыҥааһыннаах уонна быһаарыылаах күрэхтэһиитэ – аан дойду чемпионата ыытыллар. Маннык эппиэттээх күрэхтэһиигэ биһигиттэн Владимир Егоров (Хотугу Македония), Николай Охлопков (Румыния), Георгий Окороков (Австралия), Андрей Бекренев уонна Ньургун Скрябин (иккиэн Беларусь), Айаал Лазарев (Кыргызстан) кыттарга бэлэмнэнэ сылдьаллар. Чемпионакка, олимпийскай ыйааһыннарга биэс күүстээхтэр ахсааннарыгар киирбиттэр – эһиил Парижка ыытыллар Олимпиадаҕа кыттар быраабы ылыахтара.

Онон, тустууну таптааччылар уоскуйбаппыт. Этэргэ дылы, эмиэ аһыыр аспытын, утуйар уубутун умнар күннэрбит чугаһаатылар.

Петр Павлов.  

Добавить комментарий

Ваш адрес email не будет опубликован. Обязательные поля помечены *

136667
Бүгүн : 176